“Ami diskute kona-ba apoiu nutrisaun-feto no labarik kiik sira”
DILI, 19 Marsu 2025 (TATOLI)—Embaixadór Kanadá ba Indonézia no Timor-Leste, Jess Dutton, kuarta ne’e, hasoru malu ho Prezidente Repúblika José Ramos Horta hodi diskute kona-ba relasaun bilaterál entre nasaun rua iha futuru, iha Palásiu Prezidensiál Nicolau Lobato, Bairru Pite, Dili,.
Embaixadór Kanadá ba Indonézia no Timor-Leste, Jess Dutton, hateten nia hala’o enkontru ho Prezidente Repúblika diskute kona-ba kooperasaun no kontinua apoia Timor-Leste nia dezenvolvimentu iha futuru.
“Audiénsia ho Prezidente Repúblika Horta, ami diskute kona-ba kolaborasaun potensiál oioin ho Timor–Leste liuliu apoiu ba nutrisaun, ba feto no labarik kiik sira. Fó formasaun ka kapasitasaun ba feto sira iha Parlamentu Nasionál, apoiu programa ai-han liuhosi organizasaun Kanadá nian iha Timor–Leste,” nia hateten hafoin hala’o enkontru ho Prezidente Repúblika.
Nia dehan, kontinuasaun ba programa nutrisaun, Kanadá liuhosi nia adidu Defeza fó ona formasaun ba ofisiál militár timoroan no mós haruka ona membru Polísia Nasionál Timor – Leste (PNTL) ba tuir formasaun kapasitasaun iha Indonézia no Kanadá, antes ne’e fó apoiu ba Timor-Leste nia adezaun ba Organizasaun Mundiál Komérsiu (OMK) makaas tebes.
“Ami orgullu atu Apoia Timor-Leste nia adezaun ba OMK no dezenvolve ona planu negosiasaun ida no kontinua atu apoia Timor-Leste nia adezaun ba ASEAN. Nune’e, ami iha istória kolaborasaun ne’ebé naruk no hodi Governu Kanadá nia naran, ha’u apoia tebes harii Timor-Leste nia dezenvolvimentu,” nia hateten.
Iha diskusaun bilaterál Prezidente Repúblika Ramos Horta apresia ho Kanadá nia apoiu ba Timor-Leste no husu Kanadá atu apoiu nafatin Timor-Leste nia dezenvolvimentu, liuliu kona-ba Timor-Leste nia adezaun ba ASEAN.
“Ha’u hateten ba Prezidente Horta katak Kanada mak nasaun boot daruak iha mundu ho ema millaun 40. Ami sei halo buat ne’ebé di’ak-liu no kontinua apoia Timor-Leste nia adezaun ba ASEAN hodi loke oportunidade barak liután ba kolaborasaun no ami iha pergunta hanesan no ezije globalmente Timor-Leste hanesan sistema multilaterál ne’ebé forte atu kontinua kooperasaun iha mundu,” nia hateten.
Jornalista : Hortencio Sanchez
Editór : Cancio Ximenes
