DILI, 26 Marsu 2025 (TATOLI)—Prezidente Repúblika, José Ramos Horta, hateten desizaun Tribunál Supremu nian hodi la estradita Arnolfo Teves Jr. ba nia rai-moris fatin Filipina, la afeta Timor-Leste nia adezaun ba Asosiasaun Nasaun Sudeste Aziátiku (ASEAN).
“Desizaun ne’e la afeta Timor-Leste nia adezaun ba ASEAN no ida-ne’e normál,” Prezidente Horta hateten ba jornalista sira iha Palásiu Prezidensiál Dili, tersa (25 Marsu 2025) ne’e.
Xefe Estadu konsidera, desizaun Tribunál Supremu nian ne’e loos hodi la halo estradisaun ba Arnolfo Tevez.
“Buat ne’ebé ita-boot sira presiza lee didi’ak mak desizaun Tribunál nian. Ha’u la fó komentáriu, ha’u respeita desizaun Tribunál nian, ha’u reune ona ho Primeiru-Ministru kona-ba ha’u-nia téknika jurídiku, tanba ne’e opiniaun husi tribunál ne’e loos,” nia dehan.
Nia adianta tan, iha deklarasaun ne’ebé konkorda ona, Tribunál halo de’it estradisaun maibé la hateten katak Arnolfo tenke hela iha Timor-Leste.
“Maibé tribunál deklara katak, atu estradita ka la’e, Tribunál la hateten bele ka lae nia bele hela iha Timor, fó direitu ba nia atu hela iha Timor, tribunál la hateten. Ne’e desizaun polítika husi Timor-L,este,” nia esplika.
Antes ne’e, iha 20 Marsu 2025, Tribunál Supremu liuhusi Tribunál Supremu aprova ona rekursu ne’ebé hato’o husi Defensór Arnolfo Teves nian, advogadu Jose Ximenes, atu labele estradita Arnolf Teves fila ba nia rai Filipina.
Antes ne’e, iha 15 Dezembru 2024, Arnolfo Teves Jr. nia defensór, Advogadu Privadu José Ximenes, hatama rekursu ida ba Supremu Tribunál hodi husu ba Supremu Tribunál atu labele estradita Arnolfo Teves Jr. Hodi bele repatria ba nia rai Filipina.
Jornalista : Hortencio Sanchez
Editor : Cancio Ximenes
