ERMERA, 01 Abríl 2025 (TATOLI) – Ministériu Agrikultura, Pekuária, Peskas no Floresta (MAPPF) husu komunidade sira iha Munisípiu Ermera, espesialmente, suku Asulau Sare, Postu administrativu Hatólia A, atu labele tesi ai no sunu rai arbiru iha foho-lolon sira inklui iha rai tetuk.
“Ha’u husu ita-boot sira atu komunika no fó hatene ita-nia povu kona-ba floresta ne’e, tenke ita fó hatete ita-nia ema, labele tesi ai sira iha foho-lolon ne’ebá, labele halo to’os beibeik iha foho-lolon ne’e, mota ne’e luan nune’e, tanba nia lori sedimentasaun ka lori rai sira iha foho-lolon ne’ebá tuun mai ne’e, bainhira udan nune’e”, Ministru Agrikultura no Peskas, Marcos da Cruz, informa ba jornalista sira, hafoin lansa mákina agríkola modernu iha, Ermera, suku Asulau Sare, ohin.
Suku Asulau Sare iha ninia potensialidade setór agrikultura haree kuaze 80, ne’ebé perkore másimu iha munisípiu Ermera tomak, maibé kuaze natar ektare lubun ida mak mota lori, ne’e kauza husi tesi ain arbiru iha foho-lolon, hodi mosu sedimentasaun no estraga hotu plantasaun inklui komunidade nia uma.
“Se mak halo natar iha rai tetuk, duké ba halo fali to’os iha foho-lolon ne’ebá, di’akliu nia halo rua-rua ne’e hotu iha rai tetuk ne’e. Problema ida bee mai estraga natar ne’e, tanba problema floresta ne’e, ita ladun rona malu, ne’ebé ita halo to’os iha leten ne’ebá, ita tesi hotu ai sira iha foho-lolon ne’e maka problema” Ministru ne’e akresenta.
Nia enfazé, úniku solusaun ida mak presiza koopera malu, dehan ba maluk sira iha leten ne’ebá atu labele halo to’os. Tanba ne’e Ministru Agrikultura husu komunidade sira atu rona orientasaun husi prezidente autoridade, atu neineik bele hamenus risku rai halai, no rai-mamuk sira ne’e atu kuda ai-oan hodi proteje no promove eko Sistema floresta nian iha Timor-Leste.
Notísia relevante:MAPPF entrega mákina modernu ba grupu agríkola iha Ermera
Jornalista: Alexandra da Costa
Editór: Rafael Ximenes de A. Belo
