OEKUSI, 02 Abríl 2025 (TATOLI) –Komunidade ne’ebé lokaliza iha bairru Maonese, aldeia Bonemese, suku Naimeko, sub-rejiaun Pante Makasar, Rejiaun Administrativa Espesiál Oekusi Ambeno (RAEOA), voluntariamente aterru estrada kuak tanba ameasadu atu kotu totál hodi fó ameasa ba movimentu transporte públiku bá aldeia Noque, aldeia Baqui inklui postu Unidade Patrollamentu Fronteira (UPF) Leolbatan no Kaun.
Abitante Maonese, João Colo, hateten ho voluntariamente Tanba ne’e, komunidade sira ho provizóriamente taka kuak no kee halo luan fali estrada referida, nune’e bele fasilita transporte sir abele asesu ho séguru.
“Ami hadi’a provizóriu liuhusi organiza labarik sira halo servisu voluntáriu, depois mak depende husi kondutór kuandu hanoin fó netik sentavu ida ka rua ba sira. Tanba ita hein bainhira mak Governu mai hadi’a tan ne’e ami voluntáriu hadi’a hodi fasilita movimentu transporte,” dehan João Colo, nu’udar abitante Maonese.
Iha fatin hanesan, Xefe aldeia Bonemese, Hendrike António Abi, informa estrada ne’e hetan estragu tanba udan bo’ot akontese iha loron 27 Marsu, hodi rezulta gabiaun sira monu, nune’e difikulta transporte sira.
“Ha’u infroma kedas ba iha Diresaun Rejionál Infraestrutura (DRI) iha kedan loron 27 Marsu,kalan, atubele apoia emerjénsia,maibe to’o agora seidauk” nia hateten.
Ho situasaun ne’e, Komunidade sira voluntarimante organiza malu aterru estrada kuak atubele fasilita movimentu transporte no ema ba merkadu.
Husu empreza responsavel atu rekonstrui
Hataan ba problema estrada kotu, Xefe Departementu Ponte Estrada no Konstrolu Seia, husi Diresaun Rejionál Infraestrutura (DRI), Cornelio Seran rekoñese no komunika ona ho empreza responsavel atu rekonstrui.
“Ami haree ona tanba hetan informasaun husi autoridade komunitáriu suku Naimeko, katak estrada iha Maonese kotu, ami to’o ona fatin atu buka meiu hodi bele rezolve, maibé estrada ne’e sei iha hela kontratu ho Governu anteriór, kompañia Maferdi Unipesoál Lda, mak ezekuta obra ne’e, ami sei koordena ho nia atu hadi’a fali obra ne’ebé konstrui ona hanesan gabiun, tanba nia problema mak gabiaun mak monu, entaun presiza hadi’a fali,” nia promete.
Entretantu, estrada rurál ne’e antes ne’e reabilita iha 2021 husi empreza Maferdi Unipesoál Lda ho valór orsamentu $298,283.082, husi Orsamentu Jerál Estadu (OJE) 2021.
Jornalista: Abílio Elo Nini
Editór: Florencio Miranda Ximenes
