ERMERA, 02 Abríl 2025 (TATOLI)—Prezidente Autoridade Munisípiu Ermera (PAM), José Martinho Soares, hateten munisípiu Ermera preparadu simu polítika podér lokál no desentralizasaun administrativa bainhira Governu sentrál atribui konfiansa.
Notísia Relevante: Kaleidoskópiu: preparasaun ba implementasaun podér lokál no desentralizasaun administrativa
“Desentralizasaun ne’e dezde uluk kedan ita prepara, ita só atu prepara de’it kondisaun mínimu. Bainhira kondisaun mínimu hetan ona aprovasaun mak Governu foin fó ba ita oinsá hakat ba eleisaun,” José Martinho hateten ba Agência TATOLI iha Gleno, kuarta ne’e.
Nia dehan, kona-ba lei loos ona, hanesan lei ba eleisaun Munisipál, lei ba orsamentu Munisipál, lei ba poder lokál hetan ona aprovasaun husi Parlamentu Nasionál.
“Entaun ita hein de’it kuandu avaliasaun ba kondisaun mínimune’e to’o ona ita hakat ona ba eleisaun. Kondisaun mínimu ne’e mak saida? Munisípiu sira hotu tenke prienxe kritéria hirak ne’ebé Governu sentrál fó hanesan. Tenke iha infrastrutura ne’ebé natoon hodi halo servisu. Tenke iha funsionáriu públiku barak iha área importante sira. Tenke halo jestaun di’ak ba servisu hotu iha munisípiu,” nia tenik.
Tanba ne’e, nia hateten, munisípiu Ermera daudaun ne’e laiha problema ho rekursu umanu, maibé tenke iha formasaun hodi aprofunda funsionáriu hotu nia koñesimentu kona-ba oinsá hala’o servisu iha administrasaun públika.
Antes ne’e, Governu aprova ona projetu rezolusaun Governu ne’ebé aprezenta husi Ministru Administrasaun Estatál (MAE), Tomás do Rosário Cabral, ba ezekusaun Estratéjia Desentralizasaun Administrativa no Instalasaun órgaun reprezentativu podér lokál 2025-2028 nian.
Medida ida-ne’e ho objetivu atu reafirma Governu nia determinasaun hodi konsolida estratéjia desentralizasaun administrativa no kontinua prosesu instalasaun órgaun reprezentativu Podér Lokál nian.
Rezolusaun Governu ida-ne’e estabelese planu anuál sira, husi 2025 to’o 2028, ne’ebé inklui instalasaun servisu Balkaun Úniku iha territóriu nasionál tomak, reforsa institusionál autoridade munisípiu sira-nian, regulamentu lei sira-ne’ebé relasiona ho podér lokál no atualizasaun baze-dadus resenseamentu eleitorál nian.
Iha etapa sira tuir mai, sei promove kriasaun kondisaun sira hodi hala’o eleisaun munisipál, kapasitasaun ba prezidente munisipál eleitu sira no avaliasaun ba progresu desentralizasaun nian.
Koordenasaun ba ezekusaun estratéjia sei sai hanesan responsabilidade Ministériu Administrasaun Estatál nian, ne’ebé tenke aprezenta relatóriu semestrál kona-ba progresu ne’ebé alkansa ona no dezafiu sira ne’ebé hasoru, hodi garante kontinuidade no efikásia prosesu nian.
Rezolusaun ida-ne’e revoga Rezolusaun Governu anteriór n. 45/2020, loron 9 fulan-dezembru, no tama iha vigór iha loron ida hafoin nia publikasaun.
Jornalista : Hortencio Sanchez
Editór : Cancio Ximenes
