Komunidade Bobonaru husu Governu hadi’a estrada husi Oe-leu ba Kolimau

BOBONARU, 02 Abríl 2025 (TATOLI)—Komunidade Bobonaru husu Governu liuhusi Ministériu Obra Públika (MOP) atu tau orsamentu hodi rezolve ka hadi’a estrada husi suku Oe-leu ba to’o suku Kolimau no Suku Karabu, postu administrativu Bobonaru, munisípiu Bobonaru, tanba kondisaun fiziku atuál aat grave.

Reprezentante komunidade Bobonaru, Alberto Talo, konfirma kondisaun estrada ne’e difikulta movimentasaun transporte liuliu iha tempu udan monu rai.

Notísia Relevante: Administradór hato’o preokupasaun problema Estrada Maliana-Bobonaro ba MOP

“Foin lalais ami rona iha mídia dehan, estrada ne’e MOP halo tiha ona dezeñu, ne’e mak ami ezije tanba agora ita bele haree ho matan. Estrada ne’e aat hotu, husi Oe-leu tun mai to’o Kolimau ba to’o Karabau ne’ebá taho mak nakonu, bee-nalihun halo estrada kois ita ho motor ne’e la’o ba-mai tauk monu fali. Balun, ida lori motor ladun mahir ne’e monu, karreta mós hansan. Karreta Carry sira-ne’e mak mai mout to’o roda lakon hotu kedas. Tanba ne’e, husu ba Estadu atu tau-matan netik tanba estrada ne’e tinan 20-resin ona mak hela ho kondisaun aat, ita-nia Governu seidauk hadi’a,” Nia informa ba Agência Tatoli, iha merkadu Asudai, kuarta ne’e.

Aleinde ne’e, nia reforsa, kondisaun estrada ne’e mós afeta ba atividade ekonomía povu nian tanba difísil atu lori produtu lokál hodi asesu ba merkadu iha Bobonaru villa liuliu iha kapitál Maliana.

“Ami komunidade suku 10-resin iha ne’e maiória morís ho agrikultór, dalan aat hanesan produtu sira ami kuda ne’e mós la folin. Susar tebes ami atu hetan osan, dalaruma loron bazár mak lori ba merkadu, maibé semana ida dala ida de’it. Ita atu ba beibeik mós ladi’ak, estrada ne’e mak halo ita baruk atu la’o,” nia hateten.

Motorista Kamioneta, Domingos Afonso Lelo, reforsa Governu presiza aselera prosesu konstrusaun, tanba estrada ne’e nu’udár obra husi okupasaun Indonézia nian.

“Ita ukun-an tiha, iha 2005 sa’e mai ne’e, ita haree estrada sira-ne’e sei di’ak maibe husi 2010 to’o ágora ne’e estrada aat hotu. Alkatraun hela rohan-rohan de’it ona, até agora ita-nia Governu seidauk halo foun, tinan-tinan fakar rai de’it. Depois, udan mai aat fila-fali, taho dodok no natár ida karik ita kuda haré pas loos. Depois kolan-oan mak barak, ita la’o mós iha ninin de’it tanba tama klaran ko’ak boot hotu,” nia dehan.

Xefe Sentru Saúde Kakanea, Agapito Bere Sai, hateten problema ne’e difikulta no karreta Ambulánsia atu transporta pasiente ho emerjénsía husi suku ba fasilidade saúde ne’ebé besik no Hospitál Referál Maliana.

Nia dehan, provizoriu karreta Ambulánsia labele asesu ba aldeia haat (4) hansan aldeia Beamuas, Polo, suku Kolimau, aldeia Purugua, suku Ilat-laun no aldeia Ai-aras iha suku Soilesu.

“Ida-ne’e, tempu udan, ami labele asessu tanba kondisaun estrada ladi’ak, ida-ne’e kazu emerjénsía ruma ita araska,” nia dehan.

Enkuantu, iha fulan-Fevereiru liubá, administrador postu administrativu Bobonaru, Tomás Henriques, hato’o diretamente problema ne’e ba Ministru Obra Públika (MOP), Samuel Marçal, oinsá atu tau orsamentu hodi rezolve.

Enkuantu, estrada ne’e liga mós ba suku Atara, postu administrativu Atsabe, munisípiu Ermera no suku Lepo, postu administrativu Zumalai, munisípiu Kovalima inklui mós munisípiu Ainaru.

Notísia Relevante: Autoridade lokál preokupa bee nalihun iha estrada ligasaun Maliana-Bobonaro

Jornalista : Sergio da Cruz

Editór        : Cancio Ximenes