DILI, 03 Abríl 2025 (TATOLI)—Xefe Gabinete Guarda Nasionál Estadu Unidu Amérika (EUA), Jenerál Steven S. Nordhaus, kinta ne’e, hasoru malu ho Prezidente Repúblika, José Ramos Horta, hodi diskute kona-ba kooperasaun seguransa entre Timor-Leste ho EUA, iha Palásiu Prezidensiál Nicolau Lobato, Bairru Pité, Dili.
“Ha’u hakarak agradese ba Prezidente Ramos Horta tanba fó ona onra ba ha’u atu hala’o enkontru ida-ne’e no pasa tempu balun ho ami no ami-nia parseiru Estadu husi Rhode Island, Jenerál Tom Hannigan. Ida-ne’e sai hanesan vizita furak ida ba ami mai Timor-Leste no ida-ne’e kona-ba valór sira-ne’ebé fahe no buat sira-ne’ebé ami bele halo hamutuk hodi aprende ba malu. Ida-ne’e sai enkontru ida-ne’ebé di’ak tebes,” Jenerál Steven informa ba jornalista sira.
Nia subliña, importánsia husi kolaborasaun kontínua entre Estadu Unidu Amérika no Timor-Leste iha setór defeza no vizaun hamutuk ba futuru ida-ne’ebé seguru no prósperu.
Entretantu, hasoru Prezidente José Ramos Horta, nia mós hasoru malu ho Primeiru-Ministru Xanana Gusmão, Ministru Defeza Donaciano do Rosário Gomes, no Vise Xefe Estadu Maiór Jenerál Majór Jenerál Calisto dos Santos Coliati.
Enkontru hirak ne’e, ne’ebé hala’o iha ámbitu Programa Parseria Estadu nian, subliña Estadu Unidu Amérika nia kompromisu ba tempu naruk hodi reforsa lasu seguransa nian ho Timor-Leste.
Diskusaun hirak ne’e foku ba hakle’an kooperasaun militár bilaterál, hasa’e kapasidade defeza nian no fasilita interkámbiu perísia estratéjiku sira hodi apoia estabilidade no seguransa rejionál iha Indo-Pasífiku.
Jenerál ne’e mós sei partisipa iha serimónia ofisiál entrega Hangar Aviaun nian no Armajen Asisténsia Umanitária no Auxíliu Dezastre (HADR) ba Komponente Aérea F-FDTL iha Baucau iha loron 04 fulan-Abríl 2025.
Serimónia ne’e marka momentu importante ida iha parseria defeza Estadu Unidu-Timor-Leste, no fasilidade foun hirak ne’e sei hasa’e F-FDTL nia kapasidade resposta ba dezastre no prontidaun operasionál, hodi reforsa Timor-Leste nia reziliénsia no seguransa.
Vizita altu nível ne’e reafirma parseria ne’ebé forte no buras entre Estadu Unidu Amérika no Timor-Leste, nune’e reflete kompromisu hamutuk ida ba kooperasaun defeza, estabilidade rejionál no kolaborasaun ba tempu naruk.
Jornalista : Hortencio Sanchez
Editór : Cancio Ximenes
