DILI, 03 Abríl 2025 (TATOLI)–Primeiru-Ministru (PM), Kay Rala Xanana Gusmão, hateten Governu fó doasaun rihun $500 ba Myanmar liuhusi ASEAN hodi tulun populasaun iha nasaun referidu ne’ebé sofre rai-nakdoko iha loron hira ba kotuk.
“Foin lalais rai-nakdoko makaas iha Myanmar akontese to’o Tailándia halo uma andar barak mak rahun no populasaun barak mak mate, entaun Konsellu Ministru deside fó doasaun balun ba sira liuhusi ASEAN,” Xefe Governu ne’e hateten ba jornalista sira iha Palásiu Prezidensiál Nicolau Lobato, Bairru Pite, kinta ne’e.
Nia dehan, Ministériu Negósiu Estranjeiru no Kooperasaun (MNEK) dehan katak Tailándia sira iha ne’ebá mós terus no Tailándia iha nasaun balun fó hela ajuda, ne’e mak Timor-Leste ajuda mak sira-ne’ebé terus liu ne’e, dehan iha fronteira Tailándia nian laiha hahan, laiha uma, laiha roupa no buat sira-ne’e hotu ne’e maioria Myanmar nia teritoriu ne’e mak horisehik Timor-Leste fó netik apoiu balun ba sira, Timor-Leste haruka ba ASEAN mak fó fali ba sira.
Konsellu Ministru aprova Projetu Rezolusaun Governu, ne’ebé aprezenta husi Vise-Ministra ba Asuntu ASEAN, Milena Maria da Costa Rangel, kona-ba Kontribuisaun Voluntária ho montante rihun $500 ba Sentru Koordenasaun Asisténsia Umanitária ASEAN (ASEAN Coordinating Center for Humanitarian Assistance (AHA Center)), hodi apoia resposta ba situasaun emerjénsia iha Repúblika Uniaun Myanmar, tanba kauza husi rai-nakdoko foin lalais, ne’ebé afeta ba rejiaun ne’e, ho konsekuénsia grave, ho konsekuénsia grave, inklui lakon vida, dezlokasaun populasaun no destruisaun ba infraestrutura sosiál, ekonómika no ambientál.
Jornalista : Hortencio Sanchez
Editór : Cancio Ximenes
