BOBONARU, 04 Abril 2025 (TATOLI)—Komunidade sira iha postu administrativu Bobonaru, munisípiu Bobonaru, preokupa tanba durante ne’e sempre akontese eletrisidade mate-lana liuliu iha tempu udan.
Komunidade, Fidelia Soares Moniz, husu ba EDTL, E.P munisípiu Bobonaru atu buka solusaun hodi rezolve problema ne’e ho sériu, tanba bainhira ahí mate-lakan bele fó impaktu ladi’ak hodi estraga komunidade nia sasán eletróniku sira iha uma.
Notísia Relevante: Komunidade preokupa ahi lakan-mate iha Bobonaro no Lolotoe
“Ami-nia ahi ida-ne’e sempre mate-lakan loro-loron de’it. Di’ak ida mai, kalan ne’e bele mate dala-rua ka tolu tan. Kuandu udan, aat liután, dalaruma la udan mós mate hela de’it, lahatene tanba saida. Ami-nia sasán eletróniku sira hanesanTV (Televizaun), Kuluna, Jalera sira-ne’e bele terbakar hotu, kuandu hanesan ne’e beibeik,” Nia informa ba Agência Tatoli, iha merkadu Bobonaru, sesta ne’e
Abitante Aldeia Taimea, suku Malilait, João Afonso de Jesús, hateten durante ne’e ahí mate-lakan difikulta tebes sira halo atividade iha tempu kalan.
Nia dehan, problema ne’e sira hato’o beibeik ona ba tékniku EDTL, E.P destakadu iha postu administrativu Bobonaru maibé to’o agora seidauk rezolve.
“Ami-nia ahi ne’e mak problema, nusa karik, kala-kalan mate hela de’it. Ita atu la’o ba-mai uma laran mós ladi’ak, labarik sira estuda mós ladi’ak tanba nakukun. Ami sunu lilin de’it, dala-rua nia mate la kle’ur de’it lakan fali, depois mate fali, di’ak ida mate to’o loron. Ami losu tiha listrik, entaun to’o dadeer nia ne’e estraga hotu ami-nia sasán iha Jelera laran, Ayam Potong, Naan, Sosis sira ne’e aat hotu. Problema ne’e kle’ur ona tanba saida sira la resolve,” nia dehan.
Xefe Unidade Eletrisidade Timor-Leste, Empreza Públika (EDTL, E’P) delegasaun territoriál munisípiu Bobonaru, Mario de Jesús, rekoñese problema ne’e akontese iha postu administrativu Bobonaru ho Loloto’e no durante ne’e esforsu atu rezolve maibé seidauk bele tanba kestaun natureza.
“Kondisaun klima udan ho anin ne’e mak halo ahí mate-lakan,” Jestór EDTL, E.P munisípiu Bobonaru ne’e klarifika
Bainhira akontese avaria besik no haree ho matan, tékniku sira bele rezolve kedas maibé balnu presiza lori tempu tanba seidauk iha ekipamentu modernu no daudaun ne’e tékniku sira deteta avaria ho de’it sistema manuál buka husi ai-riin ida ba ai-riin seluk.
Nia m’os husu ba komunidade atu koopera ho ekipa tékniku sira bainhira identifika avaria iha fatin balun informa lalais, nune’e bele rezolve imediata.
Nia hatutan, bainhira akontese sirkuitu ruma komunidade tenke fó hatene kedas ba tékniku EDTL, E.P, labele Koko atu rezolve mesak tanba bele fó impaktu ba ema nia vida.
Nia fó hanoin ba komunidade bainhira akontese ahí lakan-mate tenke dezliga kedas sasán eletróniku no bainhira ahí lakan fila-fali hein to’o minute 15 ou 20 mak halo fali ligasaun.
Notísia Relevante: EDTL Bobonaro esforsu rezolve ahi mate-lakan
Jornalista : Sergio da Cruz
Editór : Cancio Ximenes
