DILI, 07 Abríl 2025 (TATOLI)-Estudante husi eskolaridade hotu hahú husi ensinu terseiru siklu, ensinu sekundáriu jerál no tekniku vokasionál, ohin hahú ezame trimestre dahuluk.
Diretór Eskola Ensinu Sekundáriu Jerál (ESJ), FINANTIL, Aniceto Barlelo, husu estudante sira atu partisipa ezame ho di’ak, nune’e labele prejudika iha prosesu pasajen.
“Futuru dezenvolvementu edukasaun ne’e iha ita-boot sira nia liman, ami ho profesór sira preparadu atu fó ezame, nune’e ohin hahú ona”, nia dehan ba TATOLI iha nia knaar fatin Aimutin, segunda ne’e.
Nia dehan ekipa komisaun iha eskola mak organiza ezame ne’ebé la’o di’ak tebes. Loron dahuluk hahú ho matéria matemátika, inglés no relijiaun.
Direjente ne’e hatete kona-ba konsensaun eskolár ne’e la’ós eskola FINANTIL mak tama tarde maibé kuaze eskola hotu-hotu iha territóriu hanesan tanba submete relatóriu mak tarde.
Totál estudante iha eskola referida hamutuk 586, ho profesór 64, administrasaun tolu no guarda eskola ida. Ezame hahú ohin sei remata iha sesta 11/04/2025.
Diretór eskola Ensinu Báziku Sentrál (EBC-sigla portugés), Calistro Guterres, hatete ohin hahú ezame ona no la’o ho di’ak tebe-tebes.
“Ami ohin ne’e ezame hahú 08h00 no sei remata iha 12h00 no kontinua fali ho eskola Ensinu Sekundáriu Jerál 10 Dezembru”, dehan.
Nia dehan saladeaula ne’ebé utiliza ba ezame ne’e hamutuk 24 no totál estudante hamutuk 863 ho nia totál profesór hamutuk 47, administrasaun rua no guarda eskola rua.
Direitor Nasionál Ensinu Sekundáriu Jerál, Benjamin Fernandes, kontinua motiva estudante atu tuir ezame iha trimestre dahuluk iha tinan ne’e, tanba futuru iha joven sira-nia liman.
“Tanba ita-nia profesór sira preparadu no prepara hotu ona matéria ezame, nune’e espera estudante sira mós preparadu hodi tuir ezame no espera ho valór ne’ebé di’ak”, dehan.
Notísia relevante: Konsensaun eskolár tama tarde sei afeta ba ezame nasionál
Jornalista : Osória Marques
Editora : Rita Almeida
