DILI, 10 Abríl 2025 (TATOLI)-Estadu Timor-Leste liuhusi Prezidente Repúblika, José Ramos Horta, kinta ne’e fó rekoñesimentu brigada médika Kubanu hamutuk 66, ne’ebé termina sira-nia misaun tinan-rua iha Timor-Leste.
Dezde 2023, kontribuisaun la’ós de’it kuidadu direta ba pasiente maibé formasaun importante ba dotór, enfermeiru, no tékniku timoroan sira iha estabelesimentu saúde oioin no iha Fakuldade Medisina Universidade Nasionál Timor-Leste (UNTL).
“Ohin, ita rekoñese la’ós de’it profisionál médiku sira ho kualifikasaun, maibé belun loloos sira Timor-Leste nian ne’ebé hatudu ona ideál aas liuhusi solidariedade internasionál”, Xefe Estadu hato’o iha serimonia ne’ebé hala’o iha Galeria Memória Viva, Farol.
Ramos Horta hatutan: “Dotór na’in-66 ne’e hametin ona ita-nia sistema kuidadu saúde, salva ona vida, no transfere koñesimentu folin-laek ba ita-nia profisionál médiku sira. Sira-nia dedikasaun hodi serbí ita-nia komunidade ne’ebé remota liu reprezenta amizade ne’ebé metin entre Kuba no Timor-Leste”.
Nia dehan serimónia ne’e marka kapítulu susesu ida-tan iha akordu kooperasaun kuidadu saúde ne’ebé kontinua entre Repúblika Demokrátika Timor-Leste no Kuba, ne’ebé sai nu’udar instrumentál ba dezenvolvimentu infraestrutura no kapasidade médika Timor-Leste nian.
Notísia relevante: Médiku kubano 16 konklui ona misaun iha TL
Jornalista : Osória Marques
Editora : Rita Almeida
