DILI, 10 Abríl 2025 (TATOLI)-Primeiru-Ministru, Kay Rala Xanana Gusmão, hatete preokupa de’it mak osan dolar tun-sa’e, la’ós persentajen taxa ne’ebé Prezidente Estadu Unidus Amérika, Donald Trump, atribui ba Nasaun sira.
“Ha’u nia problema mak ida-ne’e de’it mak dolar sa’e ka dolar tun”, Xefe Governu hatán ba jornalista sira hafoin enkontru semanál ho Prezidente Repúblika, José Ramos Horta, iha Palásiu Prezidensiál, kinta ne’e.
Xanana Gusmão esplika razaun ladún preokupa konaba taxa ne’ebé atribui husi Amérika, tanba produtu esportasaun no importasaun la’ós barak husi nasaun referida.
“Imi sosa buat ruma husi Amérika, imi faan buat ruma bá Amérika. Timor-Leste importa husi Amérika ne’e hira, Timor-Leste esporta hira karik bá Amérika”, Xanana argumenta.
Nia reitera: “Ita-nia problema de’it mak dolar sei sa’e, ita-kontente, se tun ita-mak tenke dada, haka’as sintu nune’e lalika-han, dala-ruma ita-nia problema matan labele boot liu kabun”.
Antes ne’e, iha loron 2 fulan-Abril tinan 2025, Prezidente Estadus Unidus, Donald Trump, fó sai tarifa foun sira ho pursentu 10 ba Nasaun sira ne’ebé durante ne’e importa sira-nia produtu bá EUA.
Notísia relevante: Horta konsidera desizaun Prezidente EUA la fó impaktu ba Timor-Leste
Jornalista : Osória Marques
Editora : Rita Almeida
