DILI, 11 Abríl 2025 (TATOLI)-Governu liuhusi Ministériu Edukasaun (ME) no Governu Reinu Unidu, sesta ne’e iha salaun konferénsia ME, lansa programa formasaun kompeténsia ba partisipasaun iha ekonomia sosiál (FCPES, sigla portugés).
Diretora-Jerál Planeamentu, Polítika Inkluzaun no Teknolojia Informasaun iha ME, Odelia das Dores Martins, hatete atividade tuir-mai apoiu progresu edukasaun labarik sira-nian.
“Programa Supporting the Advancement of Girls’ Education (ASEAN-UK SAGE) ho objetivu rezolve edukasaun no lakuna jéneru iha abilidade empregabilidade iha Sudeste Aziátiku tomak”, Diretora jerál dehan.
Programa ne’e nu’udar programa pilotu, no sei implementa iha Oekusi no Lautein, hakbiit joven sira, liu-liu labarik feto sira iha área rurál ba área empreendedorizmu, literasia dijitál no abilidade kmaan.
Diretora Misaun Dezenvolvimentu Reinu Unidu nian ba ASEAN, Amanda McLoughlin OBE, hatete programa ne’e apoia kreximentu ekonómiku no dezenvolvimentu sustentável, partikularmente iha edukasaun no formasaun abilidade no kompeténsia sira.
“Projetu ida-ne’e tuir duni polítika Reinu Unidu nian, ne’ebé bele kontribui ekonomikamente ba promove igualdade jéneru no haburas reziliénsia ekonómika iha Sudeste Aziátiku”, dehan nia.
Diretór ne’e agradese ba parseiru sira ne’ebé envolve iha programa Supporting the Promotion of Girls’ Education (ASEAN-UK SAGE), Konsellu Britániku no Entidade Nasaun Unida ba Igualdade Jéneru no Hakbiit Feto iha Timor-Leste no Ministériu Edukasaun ba kolaborasaun.
Objetivu husi programa ne’e promove aprendizajen fundamentál iha Timor-Leste, no foku partikulár ba labarik no grupu sira ne’ebé desfavoresidu, alende ne’e promove ekuidade no igualdade jéneru.
Jornalista : Osória Marques
Editora : Rita Almeida
