DILI, 15 Abríl 2025 (TATOLI)—Prezidente Repúblika, José Ramos Horta, tersa ne’e, kondekora Medalla Méritu no Sertifikadu Elojiu ba atleta no treinadór timoroan sira-ne’ebé partisipa no hatudu prestasaun di’ak iha Jogu Sudeste Aziátiku (SEA Games 2024).
Kondekorasaun ne’e fó sai liuhusi dekretu-lei ne’ebé asina husi Prezidente José Ramos Horta iha loron 08 fulan-Abril tinan 2025.
Reprezentante Xefe Estadu no atuál Xefe Gabinete Prezidénsia Repúblika Jesuína Maria Ferreira Gomes, aprezenta kondekorasaun ne’e iha serimónia ofisiál ne’ebé hala’o iha Palásiu Prezidensiál Nicolau Lobato.
Resipiente sira inklui reprezentante na’in-lima (5) husi Konfederasaun Desportu Timor-Leste (CDTL), husi atleta hamutuk 32 mak ba kompeteiha eventu SEA Games husi 2009 to’o 2024.
Atleta hirak ne’e husi modalidade, Boxe, Shorinji Kempo, Karate-do, no Taekwondo, hamutuk ho treinadór na’in-15.
Medalla Méritu ne’e rekoñese realizasaun exelente husi atleta Timoroan sira-ne’ebé reprezenta Timor-Leste iha kompetisaun desportu internasionál no lori rezultadu esepsionál ba nasaun.
Reprezentante sira tuirmai husi Konfederasaun Desportu Timor-Leste simu Medalla Méritu mak hanesan:
- Macário Floriano Sanches, Reprezentante husi Konfederasaun Desportu Timor-Leste.
- Miguel Marques Gonçalves Manetelu, Reprezentante husi Modalidade Shorinji Kempo.
- João José Fernandes, Reprezentante husi Modalidade Bokse.
- Filomeno Soares de Araújo, Reprezentante husi Modalidade Karate-do.
- Gabriel J. M. F. de Jesus da Costa, Reprezentante husi Modalidade Taekwondo.
Entretantu atleta hamutuk na’in-lima (5) de’it mak hetan medalla méritu tanba konsege lori medalla osan-mean mai Timor-Leste mak hanesan:
- António Manuel
- Brígida Nívia M.L. Savio
- Julianto Pereira
- Silviana de Jesus Carvalho
- Dorceyana Borges
- Lola Caldas da Silva da Costa
Entretantu, atleta na’in 26 no treinadór 15 simu Sertifikadu Elojia ba sira-nia kontribuisaun no realizasaun exelente.
Iha diskursu Prezidente nian, ne’ebé hato’o husi Xefe Gabinete, Prezidente Ramos Horta hateten. Atleta sira-ne’e nu’udár embaixadór Timor-Leste nian iha palku global.
“Ita-nia atleta sira nu’udar embaixadór Timor-Leste nian iha palku globál. Medalla Méritu sira ne’e la’ós de’it onra exelénsia atlétika, maibé maibé ita-boot sira-nia personifikasaun ba ita-nia espíritu nasionál,” PR Horta hateten.
Nia hateteen, liuhusi atleta sira-nai dedikasaun no dignidade iha kompetisaun ne’e sira hatudu sé mak sira no hodi hametin desportu.
“Liuhusi imi-nia dedikasaun no dignidade iha kompetisaun, imi hatudu ba mundu sé mak ita nu’udar povu ida. Desportu hametin ita hamutuk liu husi diferensa no inspira ita-nia juventude atu mehi ho aten-brani bainhira ita harii Timor-Leste ida-ne’ebé realizasaun atlétika hametin unidade nasionál no pás,” nia dehan.
Serimónia ne’e reprezenta nasaun nia agradese ba atleta sir- ne’e, tanba liuhusi sira-nia dedikasaun, dixiplina no realizasaun, sira hasa’e aas ona bandeira Timor-Leste aas no hatudu espíritu indomável povu Timor-Leste nian.
Tuir nia, alteta sira-nia susesu reflete nasaun nia forsa no determinasaun ne’ebé buras ba beibeik iha palku mundiál, sai nu’udar inspirasaun ba sidadaun timoroan hotu bainhira nasaun ne’e kontinua harii nia demokrasia joven.
Jornalista : Hortencio Sanchez
Edidór : Cancio Ximenes
