DILI, 15 Abríl 2025 (TATOLI)—Prezidente Repúblika, José Ramos Horta, tersa ne’e, hasoru malu ho Embaixadora Timor-Leste ba Portugál, Laura Abrantes, hodi diskute kona-ba preparasaun simeira Xefe Estadu no Governu Komunidade País Lian Portugés (CPLP) ne’ebé sei akontese fulan-Jullu mai ne’e, iha Guiné Bissau, iha Palásiu Prezidensiál Nicolau Lobato, Bairru Pité, Dili.
Diplomata ne’e esplika enkontru iha nível Xefe Estadu no Governu ne’e, hanesan enkontru rotasaun kada tinan rua ba alfabetizasaun.
“Tuir planu, simeira Xefe Estadu no Governu sei akontese iha fulan-Jullu, Prezidente Repúblika fó instrusaun kona-ba preparasaun enkontru iha Guiné Bissau,” Laura Abrantes hateten ba jornalista sira hafoin remata reuniaun ho Xefe Estadu.
Embaixadora ne’e hatutan, Prezidente Repúblika fó instrusaun kona-ba servisu diplomata ne’e hodi Estadu nia naran nu’udár polítika diplomátika nhanesan Estadu membru CPLP.
Tuir diplomata ne’e, kestaun ida mak promosaun lian portugés iha Estadu-membru sira, inklui Timór-Leste.
Antes ne’e, iha 02 Abríl 2024, Primeiru-Ministru Kay Rala Xanana Gusmão husu Embaixadora Timor-Leste ba Komunidade Lian Portugés (CPLP, sigla portugés), Laura Abrantes, atu estabelese kooperasaun importante haat (4) ho país belun sira.
“Papel embaixadora nian iha CPLP, hosi orientasaun sira ne’e atu haree, purtantu, tenke halo leitura ida ba país membru, Estadu membru CPLP, depois apreende, haree, halo analiza saida mak ita bele iha kooperasaun ita bele halo. Tanba iha pilár haat importante, ne’ebé sai hanesan misaun embaixadora nian reprezenta Timor-Leste ba CPLP Embaixadora hateten hafoin reuniaun ho PM, iha Palásiu Governu.
Pilár importante sira ne’e mak komité konsertasaun polítika permanente, divulgasaun ka difuzaun lian portugés, kooperasaun ein termu área setór ne’ebé haree husi estudu sira entre nasaun membru CPLP ho Timor-Leste, pilár ikus liu mak komérsiu emprezárial.
Xefe Ezekutivu husu Embaixadora atu tau aas no promove interrese polítika no ekonomia, edukasaun no asuntu prioridade seluk tan ho CPLP.
“Ne’e onra ida hanesan Embaixadóra Timor-Leste ba CPLP, iha obrigasaun atu mai fó hatene no ko’alia ho Primeiru-Ministru, husu orientasaun. Buat sira-ne’ebé mak halo misaun ida hanesan reprezenta país Timor-Leste junta CPLP nian. Xefe Governu orienta ein termu polítika diplomasia, ekonómikamente, no edukasaun tanba asuntu sira ne’e nu’udar prioridade,” nia dehan.
Embaixadora konsidera mensajen polítika no motivasaun husi Xefe Governu importante hodi orienta durante hala’o misaun ho susesu.
Laura Abrantes simu pose husi Prezidente Repúblika, José Ramos Horta iha Palásiu Prezidensiál Bairru Pité, iha marsu 2024.
Jornalista : Hortencio Sanchez
Editór : Cancio Ximenes
