DILI, 15 Abríl 2025 (TATOLI) – Timor-Leste partisipa Expo Osaka Japan 2025 hodi promove identidade kulturál país nian no destinasaun turístiku ba vizitante sira ne’ebé prezensa iha eventu mundiál ho tema “Designing Future Society for Our Lives”.
Produtu Timor-Leste nian ne’ebé demonstra iha eventu ne’e mak hanesan ropa tradisionál, tais, asesóriu, no rekursu naturál sira.
Abertura ba espozisaun mundiál ne’e halo ona iha loron 13 Abríl, ne’ebé hetan partisipasaun husi Vise-Primeiru-Ministru no Ministru Koordenadór ba Asuntu Ekonómiku no Ministru Turizmu no Ambiente, Francisco Kalbuadi Lay, ho delegasaun no membru Parlamentu Nasionál.
Tuir nota ne’ebé TATOLI asesu husi pájina Ministru Koordenadór ba Asuntu Ekonómiku (MKAE), Timor-Leste sei vizita bá pavillaun sira husi nasaun sira hanesan Austrália, Malázia, Indonézia no nasaun membru ASEAN sira seluk.
Timor-Leste nia Ekonomia Azúl iha Expo Osaka
Iha espozisaun ne’e, Timor-Leste mós hatudu nia esforsu sira kona-ba Ekonomia Azúl ne’ebé atrai vizitante internasionál sira ba poténsia únika no beleza naturál husi país nia rekursu mariñu.
Iha pavillaun Timor-Leste nian ne’e, aleinde aprezenta arte no kultura Timór nian, inklui mós espozisaun materiál Ekonomia Azúl, liuliu livru fotográfiku, livru ba labarik ho nia livru ta’u kór “Ha’u-nia Tasi, Ha’u-nia Timor” no lembransa ho prezente oioin ba vizitante sira.
Tuir pájina Land and Maritime Boundary Office, livru ne’e, hola parte iha kampaña Ekonomia Azúl “Ha’u-nia Tasi, Ha’u-nia Timor” ho objetivu atu promove dezenvolvimentu sustentavel ba Timor-Leste nia rekursu mariñu hodi diversifika nasaun nia ekonomia.
Iha abertura espozisaun ne’e, pavillaun Timor-Leste nian hetan vizita husi Sekretáriu-Jerál ASEAN, Kao Kim Hourn, no hetan prezente Livru Fotográfiku Ekonomia Azúl ho títulu “Ha’u-nia Tasi, Ha’u-nia Timor” ne’ebé prodús husi Gabinete Fronteira Terrestre no Marítima.
Expozisaun Mundiál 2025 iha Osaka, hahu husi 13 Abríl to’o 13 Outubru 2025, ho totál pavillaun 200 no partisipa husi nasaun hamutuk 158 iha mundu, inklui Timor-Leste.
Notísia relevante: Diretór Turizmu husu Governu foun tau prioridade partisipasaun iha Expo Osaka
TATOLI
