DILI, 16 Abríl 2025 (TATOLI)—Prezidente Repúblika, José Ramos Horta , hato’o sentidu kondolénsia kle’an liu ba Sua Majestade Sultaun Ibrahim, Liurai Malázia nian, Família Real, Governu no povu Malázia hafoin falesimentu husi antigu Primeiru-Ministru Tun Abdullah Ahmad Badawi.
Iha karta ofisiál hato’o kondolénsia nian ne’ebé entrega ba Sua Majestade iha loron 15 Abríl 2025 ne’e, Prezidente Ramos Horta fó onra ba legadu husi antigu líder Malázia nian ne’ebé hala’o kna’ar nu’udár Primeiru-Ministru husi 2003 to’o 2009.
“Ami sei hanoin nafatin ho admirasaun legadu husi matebian Tun Abdullah Ahmad Badawi, estadista ho serenidade, integridad, no kompaixaun, ne’ebé dedika nia moris ba servisu no bem-estar husi nia Nasaun,” PR Horta hateten liuhusi nota ne’ebé Agência TATOLI asesu husi media Palásiu Prezidensiál Dili, ohin.
Horta hatutan, durante mandatu nu’udar Primeiru-Ministru husi 2003 to’o 2009, nia lidera Malázia ho matenek, promove estabilidade, dezenvolvimentu ekonómiku no koezaun sosiál, enkuantu promove vizaun husi Musulmanu ne’ebé progresivu no tolerante.
“Ninia lideransa inspiradór mós kontribui ba hametin kooperasaun no amizade iha ASEAN, valór sira ne’ebé Timor-Leste fahe no sei kontinua tane aas,” Horta tenik.
Prezidente espresa nia esperansa katak memória Tun Abdullah Ahmad Badawi kontinua sai fonte inspirasaun ba jerasaun futura iha Malázia no Sudeste Aziátiku.
Timor-Leste no Malázia iha relasaun bilaterál forte ne’ebé harii iha respeitu no kooperasaun mútuo, ho nasaun rua ne’e servisu hamutuk iha inisiativa rejionál oioin.
Malázia nia Primeiru-Ministru ba da-lima (5), Tun Abdullah Ahmad Badawi, mate ho idade 85. Abdullah Ahmad Badawi mate tanba nia saúde grave tebes.
Hanesan fó sai husi The Star, tersa (15 Abríl 2025), PM Datuk Seri Anwar Ibrahim presta ona nia respeitu ba Abdullah Ahmad Badawi, ne’ebé hakotu iis iha segunda (14 Abríl 2025) oras lokál Malázia nian.
Iha nia mensajen, Anwar hanoin hikas nia vizita ikus ba Primeiru-Ministru dalimak Malázia nian, no deskreve hanesan memória ida-ne’ebé di’ak tebes.
Nia saúde tun iha tinan hirak ikus ne’e tanba demensia, ne’ebé afeta nia memória, inklui naran husi nia membru família sira.
Aleinde koñesidu hanesan aman ba dezenvolvimentu rekursu umanu’ iha Malázia, Abdullah mós koñesidu tanba nia konseitu Islam Hadhari.
Jornalista : Hortencio Sanchez
Editór : Cancio Ximenes
