BOBONARU, 23 Abríl 2025 (TATOLI)—Pároku Igreja María Imaculada da Conseição iha postu administrativu Bobonaru, munisípiu Bobonaru, Pe. Ernesto Barreto, kuarta ne’e, inaugural no fó bensaun ba kapela Nossa Senhora de Graça Leobalo iha aldeia Anapál, suku Molop ne’ebé konstrui ho kontribuisaun husi sarani sira.
Notísia Relevante: Projetu sala hitu iha EBF Anapal Molop konklui
“Sira mak halibur osan ba kapela ida-ne’e iha tinan kotuk, iha tempu propagasaun COVID-19, ha’u mai vizita maske seidauk kompletu iha tempu ne’ebá. Maibé ami konsege halo misa ida iha laran hodi hanoin ida katak bainhira Krús Joven to’o mai kapela ida ne’e, sei halo inaugurasaun no ohin akontese duni ita fó bensaun hodi inaugura Kapela ida-ne’e,” nia informa ba Jornalista sira iha terrenu, hafoin halo inaugurasaun
Reprezentante sarani iha suku Molop, Armandina Moniz, hato’o agradesimentu tanba ohin loron parte igreja bele fó bensaun ba kapela Leobalu Anapál ne’ebé harii iha prosesu naruk nia laran.
“Ami hotu rekoñese lori tempu naruk iha prosesu konstrusaun kapela ne’e, maibé ami hotu nafatin firme, hamutuk fó ideia ba malu to’o ohin loron kapela ne’e hamrik no inaugura ona, hodi halo atividade igreja nia,” nia dehan.
Reprezentante sarani husi aldeia Anapál, Cándido Maia, haktuir prosesu harii kapela ne’e lori tempu naruk tanba hahú konstrui iha 1996, maibé la konsege finaliza tanba hasoru difikuldade oioin no iha tinan 2004 kontinua fila-fali maibé servisu fíziku foin atinje 25% no paradu tiha tanba liga ho krize polítika militár ne’ebé akontese iha 2006.
Nia hatutan, lori tempu naruk nia laran obra ne’e abandona maibé hanesan ema fiar-na’in, sarani sira la lakon vontade hodi halibur-malu halo kontribuisaun no sakrifisíu iha tinan entre 2022 ho 2023, atu kontinua obra ne’e no ikus konsege finaliza duni kapela ne’e iha fulan-Abríl 2025.
“Korajen ida mai ami katak ita morís iha mundu tanba Maromak mak ita iha mundu. Maromak fó moris ba ba ita kerdizer ita reza (ita harohan) maibé la’ós Maromak fó direta, maibé buat hotu ita buka, ita dere-odomatan mak Maromak sei fó. Tanba ne’e, tempu naruk, ami hasoru difikuldade maibé ami la dezanima no ohin loron ami hetan duni rezultadu,” nia hateten.
Enkuantu iha ambitu inaugurasaun ne’e, Pe. Ernesto mós fó sakramentu Baptizmu ba sarani Anapál-oan sira.
Notísia Relevante: Komunidade husu MOP prioritiza estrada-ponte iha Molop no Sibuni
Jornalista : Sergio da Cruz
Editór : Cancio Ximenes
