VIKEKE, 25 Abríl 2025 (TATOLI)—Servisu Saúde Munisípiu (SSM) Vikeke servisu hamutuk servisu edukasaun sei implementa kuidadu saúde primária protesaun ba estudante sira iha ensinu báziku sira iha Vikeke.
“Ha’u sente programa ida-ne’e importante tebes oinsá ita bele kontrola labarik sira-nia saúde iha eskola ensinu báziku sira. Nune’e, programa referida ami sei implementa kada eskola sira, ami husu servisu edukasaun no profesór sira, ita servisu hamutuk hodi implementa programa saúde primária ho di’ak,” Diretór servisu saúde munisipál Vikeke, Aljacsono S. Maia, hateten hafoin enkontru ba implementasau saúde primária, iha salaun SSM Vikeke, ohin.
Nia aprezenta programa ne’e sei foka ba estudante sira-nia saúde no nutrisaun, tanba ne’e presiza servisu hamutuk ho profesór hodi ekipa saúde bele haree estudante sira-nia kondisaun saúde durante partisipa prosesu aprendizajen.
“Pakote ida ita dehan lae ba fuma, alkól, bevida sira-ne’ebé lori ita ba moras raan midar (diabetiku). Ita sei haree ba nutrisaun labarik sira-nian,” nia dehan.
Superintedente Servisu Edukasaun munisípiu Vikeke, Adeodato da Cruz, haktuir programa saúde primária integradu hodi fó protesaun sedu ba estudante sira iha munisípiu Vikeke.
“Ita estudante sira iha eskola presiza saudavél hodi partisipa prosesu aprendizajen, tanba saúde ladun di’ak, partisipa iha prosesu aprendizajén mós ladun di’ak. Entaun, atu saúde di’ak, ita presiza halo protesaun husi Ministériu Saúde, programa ida-ne’e kontinuasaun husi tinan 2024 nian,” nia hateten.
Nia dehan, servisu edukasaun munisípiu Vikeke prontu koopera ho parte saúde hodi implementa programa referida ba eskola sira hotu, atu fó asisténsia ba estudante sira.
Prezidente Autoridade Munisipál (PAM) Vikeke, Francisco C.S de G. Soares, hateten atividade pakote kuidadu saúde primária importante tebes ba estudante sira, espera katak atividade sira-ne’e bele kontinua to’o iha baze hodi kontrolu ba programa merenda eskolár, atu bele prevene moras hada’et ba estudante sira.
“Ho atividade pakote saúde primaria ne’e hodi halo prevensaun, ne’ebé ita lakohi halo prevensaun ba ita-oan sira agora sei sai problema. Tanba moras sira mosu dalaruma ambiente sira iha eskola, entaun fasil tebes da’et ba estudante sira. Ha’u ba vizita eskola barak sanitária ladun di’ak, ne’ebé servisu edukasaun tenke tau-matan no kontru ba eskola sira iha Vikeke. Tan ne’e, programa kuidadu saúde primária sai importante, espera bele implementa to’o iha baze,” nia dehan.
Entretantu, programa ne’e fasilita husi diresaun nasionál promosaun saúde MS ne’ebé apoiu liuhusi organizasaun saúde mundiál no hetan partisipasaun mós husi Superintendente Edukasaun Viqueque, Inspektór Eskolár Postu Viqueque, Dirijente, kargu xefia no profesionál saúde sira.
Jornalista : Vitorino Lopes da Costa
Editór : Cancio Ximenes
