Autoridade Kovalima diskuti no konfirma esbosu proposta OJE ba tinan oin
KOVALIMA, 29 Abríl 2025 (TATOLI) – Prezidente Autoridade Munisípiu (PAM), Kovalima, Miguel Armada Cardoso, tersa-ne’e, lidera reuniaun Konsellu Konsellu Konsultivu Munisipál (KKM) estra-ordináriu hodi diskuti no konfirma esbosu proposta orsamentu ba 2026.
“Ohin ami aprezenta Planu Asaun Anuál (PAA) ba tinan oin ne’ebé elabora husi Ajénsia Munisipál no Planeamentu ne’ebé rezultadu mai husi reuniaun konsellu suku no asembleia munisipál hodi foti desizaun”, PAM, Miguel Armada Cardoso, dehan ba jornalista sira iha AMC, ohin.
Atividade KKM ne’e iha esbosu proposta orsamentu ba tinan oin ne’e munisípiu Kovalima propoin Orsamentu Jerál Estadu hamutuk $19,795,508.99 hodi finansia programa 16, sub-programa 47 ho nia atividade 105.
OJE 2026 ne’e fahe ba rúbrika saláriu no vensimentu $ 3,725.310.99, bens no servisu $ 1,983.098.60, Transferénsia públika $ 4,701,010.40, kapitál minór $ 1,675,330.00 no Kapitál dezenvolvimentu $ 7,710,759.00.
“Ita hatene KKM ne’ebé partisipa husi entidade husi entidade hotu hodi diskuti no halo jestaun nune’e rona husi sira ita iha ona planu hodi rona opoiniaun no ita halo aliñamentu” nia informa.
Tuir dokumentu ne’ebé mak TATOLI asesu , bazeia ba baze legál dekretu-lei númeru 84/2023 no diploma Ministeriál 85/2023 iha artigu 56 ,57 hodi ko’alia kona-ba misaun no tarefa Ajénsia munisipál no planiamentu kumpri nia knaar hodi elobora PAA ba 2026.
Ho nune’e bazeia ba sesaun traballu Ministériu Finansa orienta orsamentu ba 2026 ne’e tenke iha ligasaun ho polítika estratéjiku no prestasaun servisu no konfirma atividade ba tinan oin bazeia ba dezempeñu 2025 no alinamentu ho objetivu sira Objetivu Dezenvolvimentu sustentavél (ODS) no Planu Estratéjiku Dezenvolvimentu Nasionál (PEDN) 2011-2030.
Orsamentu ba tinan oin bazeia ba programa nune’e konseitu programa estrutura orsamentál liga entre dotasaun OJE ho programa sub-programa no atividade sira iha PAA programa Governu no planu médiu prazu husi servisu ka entidade setór administrasaun públika.
Alokasaun orsamentu ba tinan oin setór produtivu sai asuntu xave hodi diversifika kreximentu ekonomia no hamoris reseita munisipál hodi hakat kompete ba faze desentralizasaun.
Fó hanoin fali katak, Governu sentrál aloka orsamentu jerál Estadu ba 2024 mai iha Kovalima hamutuk milliaun $ 7,256.651 ne’ebé aloka ba saláriu no vensimentu $ 2,336.743, Bens no servisu $ 846.885, transferénsia Públika $ 2,556.011, kapitál menór $ 166.820 no kapitál dezenvolvimentu $ 1,350.192.
Orsamentu 2023 ne’e Governu sentrál aloka mai iha Kovalima hamutuk $ 5,738.515 ne’ebé fó prioridade ba programa 11.
Jornalista:Celestina Teles
Editór: Rafael Ximenes de A. Belo
