DILI, 29 Abríl 2025 (TATOLI)—Governu Japaun kompromete fó apoiu ba fortalesimentu alfabetizasaun no edukasaun iha Timor-Leste liuhosi implementasaun susesu Projetu Reabilitasaun Sala Leitura Xanana Gusmão (XGRR, inglés) ho orsamentu $68,324, no halo parte iha subvensaun ba asisténsia kulturál Programa Projetu sira iha Baze (GCGP).
Jerente Sala Leitura Xanana Gusmão (XGRR, inglés), Maria Amaral Guterres, hateten kontratu subsídiu nian asina iha 12 Janeiru 2024, no projetu ne’e hahú halo reabilitasaun iha Fevereiru 2024 no remata iha Fevereiru 2025.
“Fasilidade ne’ebé renova ona inklui Uma Mahon (Safe Room), biblioteka, sentru espozisaun, trotoár, vedasaun no lutu ka parede liur. Ami mós sosa meza komputadór 10, estante livru 12 no mós armáriu two-pack ba estudante sira atu uza hodi rai sira-nia sasán,” Jerente ne’e hateten ba Agência Tatoli iha nia kna’ar fatin Lecidere, tersa ne’e.
Tanba ne’e, nia hato’o agradesimentu ba Governu Japaun no Komunidade liuhusi Embaixada iha Timor-Leste ne’ebé fó apoiu hodi reabilita sala leitura ida-ne’ebé dignu ba estudante no sira ne’ebé gosta lee.
Embaixadór Japaun iha Timor-Leste, Tetsuya Kimura, hateten, projetu ne’e nu’udár forma konkreta ida husi investimentu Japaun nian ba futuru jerasaun foinsa’e Timor-Leste nian.
“Fó asesu ba rekursu edukasionál no informasaun ba labarik no foinsa’e sira mak krítiku ba konstrusaun nasaun, tanba sira mak futuru nasaun nian,” Embaixadór Kimura hateten lihusi nia diskursu.
Ekipamentu sira-ne’e mak hanesan estante livru nian no meza komputadór nian, Japaun mós fó doasaun livru ho imajen sira husi Japaun, kontinua inisiativa anteriór ida iha tinan 2022 bainhira Fundasaun Nippon fó doasaun títulu 51 iha lian Inglés ba biblioteka.
Ministra Edukasaun Timor-Leste, Dulce de Jesus Soares, hato’o agradesimentu kle’an ba Governu no povu Japaun no subliña katak projetu ne’e nu’udár realizasaun boot ida-ne’ebé fó benefísiu diretamente ba edukasaun no prezervasaun kultura nasionál.
“Sala Leitura Xanana Gusmão la’ós biblioteka de’it maibé mós espasu kulturál ne’ebé moris, símbólu aprendizajen, memória no identidade nasionál,” Ministra Dulce de Jesus hateten.
Fornesimentu materiál aprendizajen foun no fasilidade espozisaun ne’ebé halo di’ak ka reabilita Sala Leitura Xanana Gusmão sai sentru koñesimentu no kultura ne’ebé dinámiku liu.
Aleinde ne’e, nu’udar parte ida husi aniversáriu apoiu Japaun ba Timor-Leste ba da-25, Embaixada Japaun mós sei lansa kadernu komemorativu ida-ne’ebé destaka realizasaun konjunta husi nasaun rua ne’e, nune’e mós entrega livru imajen kona-ba jestaun lixu ne’ebé kria husi voluntáriu JICA nu’udár parte husi edukasaun ambientál.
Serimónia entrega ne’e, nu’udar símbolu tanjível ba espíritu kolaborasaun entre Japaun no Timor-Leste, nune’e mós prova katak diplomasia kulturál bele sai hanesan ponte forte iha konstrusaun nasaun.
Japaun hato’o nia kompromisu atu kontinua apoia inisiativa hanesan iha futuru, inklui kolabora atividade kulturál ho Sala Leitura Xanana Gusmão hodi introdús kultura Japaun nian ba jerasaun foun Timor-Leste nian.
Ho instalasaun sira-ne’ebé hadi’a Sala Leitura Xanana Gusmão oras ne’e prontu ona atu kumpre ninia kna’ar nu’udár sentru alfabetizasaun, kultura no inspirasaun ba labarik no foin-sa’e sira iha nasaun laran tomak.
Jornalista : Hortencio Sanchez
Editór : Cancio Ximenes
