DILI, 30 Abríl 2025 (TATOLI)—Governu liuhusi reuniaun Konsellu Ministru, kuarta ne’e, iha Palásiu Governu-Dili, diskute no aprova projetu Proposta Rezolusaun ba Parlamentu Nasionál, aprova Akordu Parseria entre Uniaun Europeia no ninia Estadu-membru no membru Organizasaun Estadu Áfrika, Karaíbas no Pasífiku (OEACP) ne’ebé koñesidu hanesan Akordu Samoa.
Akordu ida-ne’e asina iha loron 15 fulan-novembru tinan 2023, iha Samoa, hodi substitui Akordu Cotonou anteriór.
“Akordu Samoa ne’e define kuadru jurídiku globál ba relasaun bilaterál entre Uniaun Europeia no país sira OEACP nian ba tinan ruanulu oin mai,” tenik iha nota ne’ebé Tatoli asesu husi media KM, ohin.
Akordu foun ida-ne’e estabelese prinsípiu komún no inklui área prioridade sira hanesan direitu umanu, demokrasia no governasaun di’ak; pás no seguransa; dezenvolvimentu umanu no sosiál; kreximentu ekonómiku sustentável no inkluzivu; sustentabilidade ambientál no alterasaun klimátika; migrasaun no mobilidade.
Akordu ne’e inklui baze komún ida-ne’ebé aplikavél ba parte hotu-hotu, kompleta ho protokolu rejionál espesífiku tolu ba Áfrika, Karaíbas no Pasífiku, ne’ebé adapta ho nesesidade no dezafiu partikulár sira husi rejiaun ida-idak.
Jornalista : Hortencio Sanchez
Editór : Cancio Ximenes
