DILI, 04 Maiu 2025 (TATOLI)—Adidu Timor-Leste iha Korea, Calisto Pacheco, informa traballador timoroan naran Januario Colo ne’ebé monu iha tasi laran ne’e, agora daudaun ninia kondisaun rekupera ona.
Ekipa Adidu husi Embaixada Timor-Leste iha Seoul, liuhusi José S.C. Soares, simu informasaun ne’e no aranka kedas ba Jeollabok-do atu haree direta Januario Colo nia kondisaun no hasoru ho Diretór Ospitál nian.
“Agora Januario hela iha sala kuidadu espesiál (ICU) no nia kondisaun seidauk di’ak totál, maibé rekupera ona,” Adidu Timor-Leste iha Korea, Calisto Pacheco, haktuir ba Agência Tatoli liuhusi WhatsApp, ohin.
Tanba, nia dehan, hafoin insidente ne’e, Januario Colo hetan kedas asisténsia husi ekipa saúde, polísia, no asisténsia husi patraun ba empreza ne’e.
“Januario Colo hetan ajuda kedas husi kolega timoroan no Korea oan sira-ne’ebé servisu hamutuk iha Kompañia refere. Ho ajuda foti Januario sai husi tasi laran no iha oras balun hetan kedas asisténsia husi patraun, polísia no ekipa saúde no lori sai husi ilha Gyeado ba Hospital Daejain iha sidade Jeonju, provinsia Jeollabok-do,” nia dehan.
Tuir kronolojia, traballador timoroan ne’e servisu iha illa Gyeado, provinsia Jeollabok-do, Korea ne’e, monu iha tasi laran iha loron 03 Maiu 2025, iha tuku 10h00 (oras lokál) dadeersan.
“Akontese asidente ida-ne’ebé envolve ho ita-nia sidadaun timoroan naran Januario Colo. Asidente ne’e mosu bainhira nia halo servisu mak tali ró nian baku kona Kapitaun ró (mandór) ho traballadór Januario Colo, tanba ne’e Januario monu ba tasi laran,” nia dehan.
Jornalista : Osória Marques
Editór : Cancio Ximenes
