DILI, 05 Maiu 2025 (TATOLI)-Governu liuhusi Sekretáriu Estadu Ensinu Sekundáriu no Tékniku Vokasionál, Domingos Lopes Lemos, ohin entrega mákina arte-gráfika ho projetór rua inklui ekipamentu prátika nian ba Ensinu Sekundáriu Tékniku Vokasionál ESTV 28 Bekora.
“Ohin ami lori hela ekipamentu arte-gráfika nian, ne’ebé rezultadu fulan hira kotuk ami mai observa situasaun iha eskola ida-ne’e. Sira iha de’it makina kiikoan ida mak halo operasaun no hodi halo prátika ba labarik sira. Entaun ohin ami lori mákina ne’e mai hodi apoiu estudante ho profesór sira”, dehan nia ba jornalista sira iha eskola ESTV Bekora, segunda ne’e.
Nia dehan oferese makina ne’e objetivu dijitaliasaun ba ensinu tékniku vokasionál, tanba ne’e ME hahú ona iha eskola sira hotu. Makina ne’e ho nia medida boot, hafasıl ba manorin no prátika.
Ida-ne’e orsamentu tinan 2024 nian, ne’ebé iha rihun $41 mak ba sosa ekipamentu ho pakotemente ba ESTV sira ne’e.
Diretór ESTV 28 Bekora, Tomas Pinto, sente kontente no agradese tanba ME bele responde ona sira-nia nesesidade prátika eskola nian.
“Iha okaziaun ida-ne’e ami agradese tanba tempu ne’ebé mak kleur tebes, maibé ohin mákina arte-gráfika nian, mákina ne’e boot tebes. Durante ne’e estudante sira halo prátika ho mákina kiik, agora mákina ne’e fasilita no ajuda hodi bele produs banner boot”, nia agradese.
Nia dehan sira mós simu projetór rua, sasán eletresidade, ekipamentu prátika ofisina nian.
Totál estudante ba departamentu arte-gráfika hamutuk 90 hosi totál estudante 401 no manorin ba área espesializada ne’e na’in tolu, hosi manorin 43, espera ME mos bele anota ida-ne’e.
Notísia relevante: Eskola ESTV 28 Novembru husu governu sosa meza-kadeira ba komputadór
Jornalista : Osória Marques
Editora : Rita Almeida
