DILI, 07 Maiu 2025 (TATOLI)-Membru Institutu Nasionál Linguístika UNTL, Profesór Benjamim Corte-real, prefere lian-portugés la’ós de’it lian dixiplina ka matéria ne’ebé aprende, maibé nu’udar lian instrusaun hodi armoniza sosiedade no Nasaun.
“Ohin loron ha’u hanoin ita armoniza ba beibeik iha ita-nia persesaun no komprensaun kona-ba matéria no ita iha espíritu kolaborativu, halibur instituisaun hotu-hotu, operadór edukasaun hotu-hotu hale’u kauza nasionál ida-ne’e, ne’ebé mak adosaun ba lian portugés”, Benjamim de Araújo e Corte-Real dehan ba jornalista sira bainhira partisipa tema “polítika linguístika no dezenvolvimentu língua-portugeza iha Timor-Leste, dezafiu no prespertiva”, iha Embaixada Portugál, kuarta ne’e.
Nia husu ba Governu atu implementa lian-portugés, haree la’ós hanesan mehi aat ida, maibé hanesan instrumentu nesesáriu ida atu ajuda timoroan.
Prezidente Institutu Nasionál Formasaun Profesór no Profisionál Edukasaun (INFORDEPE), Domingos Martins, lian-portugés hanesan lian rezisténsia no identidade povu timoroan nian, tanba ne’e mak INFORDEPE fó prioridade ba formasaun lian-portugés ba profesór sira.
“Tanba ne’e maka INFORDEPE fó prioridade liu atu fó formasaun lian-portugés iha nível hotu-hotu, hahú husi pré-eskolár to’o ensinu báziku no ensinu superiór”, dehan Prezidente INFORDEPE.
Prezidente INFORDEPE kontinua esforsu fó ba formasaun ba profesór sira hotu atu domina lian ofisiál portugés no tetun.
“INFORDEPE nia hakarak mak profesór sira sei implementa iha eskola sira depois estudante sira mós sei ko’alia lian-portugés iha komunidade no iha eskola sira”, nia dehan.
Oradór prinsipál sira iha semináriu ne’e mak embaixadora Portugál iha Timor-Leste, Diretora Jerál Ministériu Ensinu Superiór no Siénsia Kultural (MESSK), Maria Filomena Lay, no partisipante sira husi estudante UNTL.
Notísia relevante: PM Xanana prefere hakerek livru iha lian Tétun-Portugés
Jornalista : Osória Marques
Editora : Rita Almeida
