KOVALIMA, 07 Maiu (2025) – Autoridade munisípiu (AM) Kovalima, liuhusi Servisu Munisipál Finansa (SMF), ezekuta ona Orsamentu jerál Estadu (OJE) 2025 ho rezultadu ezekusaun atinji 25.4% ba iha kategória tolu, iha trimestrál dahuluk – Janeiru, Fevereiru no Marsu.
Diretora Servisu Munisipál Finansa Kovalima, Rozita Semei Freitas, informa, bazeia ba regra ezekusaun orsamentu kada trimestrál ezekuta orsamentu atinji 25,4 % nune’e munisípiu ezekuta bazeia ba regra ezekusaun orsamentu.
“Ita-nia ezekusaun foin atinji 25.4 pursentu, tanba ita foin ezekuta ba iha rúblika saláriu – vensimentu, bens servisu, transferénsia publika. Kona-ba kapitál menór no kapitál dezenvolvimentu nia ezekusaun sei iha prosesu”, Rozita Semei Amaral Freitas, relata dadus ne’e ba TATOLI, iha nia servisu fatin AMC, ohin.
Governu sentrál aloka OJE 2025 mai Kovalima hamutuk, 8,293.634 husi orsamentu aloka ba saláriu no vensimentu hamutuk $ 2,538.874 ezekuta ona, $ 623,477.63 nune’e saldo sei iha $ 1,915.396.37 atinji 24,6%. Kategória bens no servisu orsamentu hamutuk $ 1,096.210 ezekuta ona $ 135,519.38 saldo sei iha $ 780,525.75, atinji ona 28,3%.
Transferénsia públika hamutuk $3,873.544.00 ezekuta ona $ 1,235.192.47 saldo $ 1,911.137.04 atinji 49,5% ho nune’e OJE 2025 nia saldo $ 5,578.882.85.
Dirijente finansa munisípiu ne’e esplika katak orsamentu munisípiu ba tinan fiskál 2025 foin ezekuta ba kategória tolu mak hanesan saláriu no vensimentu, bens senvisu no transferénsia públika.
“Ita ezekuta ona orsamentu 2025 ba kategória tolu; kategoria hanesan kapitál menor no kapitál dezenvolvimentu nia ezekusaun sei iha prosesu hela tanba ezekusaun liga ho lala’ok aprovizionamentu”, nia esplika.
Kona-ba katégoria kapitàl menor orsamentu hamutuk $ 150.000.00 no kapitál dezenvolvimentu hamutuk $ 846.874 00 ne’ebé nia ezekusaun sei iha prosesu.
Fó hanoin fali katak Governu sentrál aloka orsamentu jerál Estadu 2024 hamutuk $ 7,256.651 ne’ebé aloka ba saláriu no vensimentu $ 2,336.743 bens no servisu $ 846.885, transferénsia públika $ 2,556.011, kapitál menór $ 166,820 no kapitál Dezenvolvimentu $ 1.350.192.
OJE 2024 $ 7,256.651 ne’e atu finansia ba programa 13, sub programa 31 ho nia atividade 74 , tuir Planu asaun anuál (PAA) ne’ebé aprezenta husi kada diresaun servisu munisipál sira hotu iha munisípiu Kovalima.
Jornalista:Celestina Teles
Editór: Rafael Ximenes de A. Belo
