Janeiru to’o Abríl, MJ arrekada reseita millaun $4-resin ba kofre Estadu
OEKUSI, 07 Maiu 2025 (TATOLI)– Durante fulan haat, hahú husi Janeiru to’o Abríl 2025, Ministériu Justisa liuhusi Unidade Arrendamentu Bens Imoveis Estadu (UABIE) arrekada reseita ba kofre Estadu hamutuk millaun $4-resin.
Relatóriu ne’e, relata husi Diretór Unidade Arrendamentu Bens Imoveis do Estadu iha Ministériu Justisa, Helder Cosme Marçal, iha ámbitu divulgasaun kona-ba dekretu-lei númeru 19/2004, rejíme juridiku soin iha fatin afetasaun ofisiál no arrendamentu husi soin ne’ebé tama iha dominíu privadu Estadu, ne’ebé hala’o iha suku Bobometo sub-rejiaun Oésilo, kuarta ne’e.
Notísia relevante:MJ disemina enkuadramentu legál ualu ba komunidade iha Oésilo
“Ita iha reseita agora sa’e maka’as, husi Janeiru to’o Abríl ne’e ita konsege rekolla millaun $4-resin, arrendamnetu ne’e signifika katak rai na’in mak Estadu no ema aluga ne’e mak arrendatáriu, iha Dili asina kontratu ne’e mak Ministru ho Sekretáriu Estadu, no iha Oekusi Sekretáriu Rejionál Terra Propriedade ho Prezidente Autoridade mak asina,” nia dehan iha sub-rejiaun Oésilo.
Nia informa, taxa ne’e rekolla mai husi arrendátariu sira ba rai Estadu, tanba rai no uma utiliza husi rrendátariu ba negósiu, balun uza ba hela fatin. Tanba Estadu halo arrendamentu atu fasilita sidadaun ne’ebé mak laiha uma, bele loke kioske, loja no investimentu sira hanesan fábrika.
“Ida-ne’e mak durante ne’e Estadu regulariza mak halo kontratu arrendamentu, nune’e Estadu hetan osan hodi dezenvolve fali ita-nia rai ne’e, ha’u rona Oekusi mós agora sa’e maka’as ona,” nia afirma.
Iha biban ne’e, Diretór Diresaun Rejionál Terra Propriedade (DRTP) Oekusi, Júlio Coel, informa katak iha trimestre dahuluk husi fulan Janeiru mai to’o Marsu 2025 ne’e, DRTP liuhusi servisu kadastru konsege rekolla ona reseita ba kofre Estadu hamutuk $11,299.00 mai husi arrendamentu ba rai no uma Estadu nian.
“Reseita ne’ebé iha arrendátariu sira mai foti resibu hodi ba depozita iha banku BNU, Janeiru ita iha ona $4,125.00, fulan-Fevereiru, ita rekolla $3,709.00, fulan Marsu rihun $3-resin, ne’ebé totál trimestre dahuluk $11,299.00,” nia relata.
Tuir kontratu arrendamentu katak bainhira arrendatáriu selebra ona kontratu ho Estadu no la kumpre kontratu referidu ka tarde halo pagamentu bele fó sansaun ka hapara kontratu no bele fó 50% husi valór kontratu mensál nian.
Notísia relevante:Janeiru to’o Marsu, DRTP Oekusi arrekada reseita rihun $11 ba kofre Estadu
Jornalista: Abílio Elo Nini
Editór: Florencio Miranda Ximenes
