KOVALIMA, 08 Maiu 2025 (TATOLI) – Institutu Nasionál Seguransa Sosiál (INSS) munisípiu Kovalima, simu reklamasaun husi benefisiáriu pensaun sosiál (idozu no invalidés) na’in-tolu, durante hala’o pagamentu pensaun sosiál, iha munisípiu Kovalima.
Koordenadór INSS munisípiu Kovalima, Bernardino Sequeira, informa katak durante prosesu pagamentu iha Marsu liubá iha munisípiu simu reklamasaun husi idozu no invalidés tanba sira-nia naran rejista iha sistema maibé sira-nia osan pendente.
“Ami rejista reklamasaun husi benefisiáriu idozu no invalidés tanba sira-nia osan la tama iha sistema; hakerek pendente, razaun tanba saida ami lahatene? Maibé, iha nasionál mak bele hatene nia razaun bainhira osan la tama konserteza pendente”, Bernardino Sequeira relata ba TATOLI, iha nia servisu fatin Suai Loro, ohin.
Hafoin simu reklamasaun, tékniku INSS iha Kovalima halo verifikasaun benefisiáriu nia dokumentu dala ruma mós benefisiáriu halo mudansa dokumentu maibé la atualiza; depende ho nia motivu ne’ebé mak la hanesan, foin lalais simu reklamasaun sira-nia dadus normál maibé osan mak la tama.
“Prosesu ba ita-nia benefisiáriu ne’ebé mak hato’o reklamasaun la simu nia direitu ba pensaun, ita hatene ema ne’e na’in sei iha ho reklamasaun ita submete ba nasionál nune’e hodi hein pagamentu iha faze tuirmai simu nia direitu ho kompletu”, nia esplika.
Atu hetan pensaun benefisiáriu ba idozu no invalidés, presiza submete dokumentu mak hanesan Billeti identidade, kartaun eleitorál, prense formuláriu husi seguransa sosiál ne’ebé hetan rekoñesementu husi xefe suku sira. Ba ema ho defisiénsia presiza BI eleitorál , atestadu médiku tuir kritériu ho grau mínimu 3 to’o 4 ba leten.
Enkuantu, iha loron 17 Marsu ne’e, Ministériu Solidariedade Sosiál no Inkluzasaun (MSSI) liuhusi INSS servisu hamutuk ho Banku Nasionál Komérsiu Timor-Leste (BNCTL) hahú hala’o ona pagamentu pensaun sosiál ba idozu no invalidés, iha munisípiu Kovalima.
Pagamentu pensaun ne’ebé benefisiáriu simu ba trimestrál dahuluk nian mak hanesan, trimestre dahaat iha 2024 no trimestre ba ba dahuluk iha 2025 ne’e.
Tuir oráriu pagamentu ne’ebé jornalista TATOLI asesu katak, iha loron 17 Marsu funsionáriu BNCTL hala’o pagamentu iha postu Fatululik no postu Suai.
Iha loron 18 hala’o pagamentu iha postu Fohorem no postu Fatumea. Iha loron 19 marsu hala’o pagamentu iha postu Maukatar no Tilomar. Iha loron 20 hala’o pagamentu iha postu Zumalai.
Bazeia ba dadus idozu no invalidés mai husi postu administrativu hitu iha munisípiu Kovalima ne’ebé simu ona pensaun husi Governu hamutuk 7,362.
Fó hanoin fali katak, inísiu 2024 ne’e INSS halo pagamentu pensaun sosiál ne’ebé fahe ba kategória tolu ho nia valór la hanesan bazeia ba kategória idade mak idade 60-70 ho valór $ 60, idade 70-80 ho valór $ 80 no idade 80 ba leten ho nia valór $ 100.
Jornalista:Celestina Teles
Editór: Rafael Ximenes de A. Belo
