BOBONARU, 08 Maiu 2025 (TATOLI)—Ministériu Komérsiu no Indústria (MCI) servisu hamutuk ho Kámara Komérsiu Industria Timor-Leste (CCI-TL) Servisu Rejistu Verifikasaun Emprezariál (SERVE), Institutu Apoia Dezenvolvimentu Emprezariál (IADE), Institutu Kualidade Timor-Leste (IQTL, sigla Portugés), Banku Nasionál Timor-Leste (BNCTL) no TradeInvest Timor-Leste, organiza diálogu emprezariál ho setór privadu sira iha munisípiu Bobonaru.
Diretór Jerál Ministériu Komérsiu no Indústria (MCI), Nelito Lima de Araújo, hateten diálogu emprezariál ho tema “Hametin Setór Privadu hodi dinamiza ekonomía iha rai-laran” ne’e nu’udár meiu ida hodi fasilita halo intermediasaun no kolaborasaun interligadu entre imvestidór sira ho grupu mikro pekena empreza, mediu emprezas no agrikultór sira.
Alende ne’e, atu loke grupu mikro pekena no mediu empreza sira-nia pensamentu katak iha oportunidade atu hatudu kapasidade ba kompetisaun ekonómika iha nivél nasionál, rejionál no internasionál.
Diretór ne’e haklaken, programa ne’e mós atu hametin liutan kooperasaun emprezáriu timoroan sira-ne’ebé halo investimentu iha setór komérsiu no indústria.
Diálogu emprezariál ne’e mós atu atrai timoroan sira hodi dezenvolve inisiativa foun iha setór komérsiu, indústria ne’ebé sustentavél no orienta ba kompetisaun negósiu nasionál no internasionál, aleinde ne’e atu indetifika no promove produtu potensiál ne’ebé ho orientadu ba esportasaun.
Notisia Relevante: MCI kapasita negosiante Bobonaru iha área jestaun no estratéjia negósiu
“Programa ne’e sei hala’o ho maneira hanesan Talk Sow ho Mini-Feira, kada oradór sei aprezenta pepél husi instituisaun ida-idak nian hodi apoia setór privadu sira-nia atividade negósiu. Fó hanoin ba ita hotu katak programa ida-ne’e importante tebes ba ita ne’ebé mak hala’o atividade negósiu iha mikro pekena no media empreza ninian,” Nia hatene iha Salaun Maria-Tapo, kinta ne’e.
Sekretáriu Autoridade Munisípiu Bobonaru ba asuntu Planeamentu, Semedo Laco, hateten programa ne’e bele ajuda no motiva setór privadu sira atu halo imvestimentu iha setór produtivu ne’ebé munisípiu Bobonaru iha poténsia.
“Ita Bobonaru iha potensialidade no iha rekursu ne’ebé boot maibé agora ita seidauk iha aproveitamentu. Empreza barak sira halai liu ba konstrusaun sivíl nian, barak liu sira hein mak projetu, dalaruma projetu ne’e ‘Musiman’ tinan ida iha notinan ida bele laiha. Maibé sira barak área sira-ne’ebé atu hamoris ekonomía iha ita nia-rai sei abandona hela, seidauk book. Ita iha bee maibé la uza hodi prodús ai-han ruma, kuda buat ruma, haki’ak-ikan tanba buat hotu mai husi rai-li’ur,” nia hateten.
Konselleiru CCI-TL Munisípiu Bobonaru, Norberto José, konsidera programa ba oin setór privadu sira bele hamutuk dezenvolve inisiativa foun hodi halo imvestimentu iha setór produtivu no hamutuk kontribui hasa’e kresimentu ekonomía iha rai-laran espesiálmente munisípiu Bobonaru.
“Ha’u husu ba partisipante sira atu aproveita di’ak, bele husu buat barak ba instituisaun sira-ne’e atu esplika ida-idak nia papél oinsá atu ho empreza sira ita hasa’e ita-nia ekonomía iha rai-laran,” bia dehan.
Notisia Relevante: MCI ho parseiru lansa levantamentu dadus ba planu asaun indústria manufatureira
Jornalista : Sergio da Cruz
Editór : Cancio Ximenes
