MCI kapasita negosiante Bobonaru iha área jestaun no estratéjia negósiu
BOBONARU, 30 Abríl 2025 (TATOLI)—Ministériu Komérsiu Indústria (MCI, sigla Portugés) realiza formasaun durante loron lima hodi kapasita negosiante lokál sira iha munisípiu kona-bá Jestaun no Estratéjia Negósiu ho tema ‘Mai Ita Hasa’e Koñesrmentu hodi Bele Dezenvolve Liután Ita-nia Ekonomía Rai-laran’.
Xefe Departamentu Lisensiamentu e Kadastru, Ministériu Komérsiu Indústria, Adelia Fernandes, hateten programa ne’e nu’udar atividade regulár MCI nian ne’ebé realiza kada tinan oinsá atu motiva negosiante lokál sira kontinua iha inisiativa halo negósiu no prepara sira atu bele kompete ho negosiante estranjeiru.
Notísia Relevante: MCI husu komunidade Ermera promove kafé durante feira
“Ita haree ágora daudaun iha ita-nia nasaun Timor, ema estranjeiru barak mak mai halo negósiu iha ita-nia rai, entaun barak-liu ita haree negosiante lokál sira lakon ho negosiante estranjeiru. Entaun, ita fó motivasaun ba sira para sira bele iha nisiativa, sira bele iha vontade halo negósiu, atu hamenus negosiante estranjeiru sira faan sasán retallu. Agora, ita haree negosiante sira mós faan foos, supermie no nesesiade bázika sira seluk, entaun ita-nia negosiante sira lakon tanba sira-nia la folin ona. Xineza sira-nian mak folin fali,” nia dehan ba jornalista sira iha salaun CVTL Filiál Maliana, kuarta ne’e.
Partisipante, Adelina dos Santo, sente orgullu no konsidera programa ne’e bele hakbiit liután sira-nia koñesementu iha vida negósiu.
“Ami halo negósiu durante tinan barak ona, foin primeiravés ami hetan kapasitasaun ida hanesan ne’e, ida-ne’e benifísiu tebes ba ami. Ba oin, ami bele iha mudansa atu bele kompete ho negósiu sira estranjeiru,” nia hateten.
Enkuantu atividade ne’e hetan partisipasaun husi negósiu lokál sira inklui joven sira-ne’ebé iha inisiativu no planu atu halo negósiu.
Notísia Relevante: MCI konsidera presu nesesidade bázika iha merkadu mantein nafatin
Jornalista : Sergio da Cruz
Editór : Cancio Ximenes
