BOBONARU, 09 Maiu 2025 (TATOLI)—Autoridade Munisípiu Bobonaru (AMB) liuhusi Sekretáriu ba asuntu Planeamentu, Semedo Laco, dezafía setór privadu sira atu halibur-malu halo imvestimentu iha área produtivu ne’ebé to’o agora seidauk esplora no dezenvolve, tanba Governu prepara ona merkadu iha nivél munisípiu to’o suku no aldeia.
Semedo Laco hateten, kada tinan Governu investe osan millaun $2-resin ba programa merenda eskolár atu sosa ai-han lokál ne’ebé prodús iha rai-laran hodi fornese ba estudante sira konsumu, maibé nia implementasaun no ezekusaun la’o ladún másimu no hasoru problema tanba produtu lokál menus.
Notísia Relevante: PAM Bobonaro husu agrikultór hasa’e produsaun agrikola responde ba PME
“Ita iha merkadu boot, agora ami autoridade Munisípiu Bobonaru book aab la di’ak, tanba produtu sira-ne’ebé ita presiza maibé laiha. Merenda eskolár ne’e, ita hakarak ita-nia oan sira haan foos-rai (lokál), han modo-tahan ne’ebé orgániku, lakohi han na’an Ayam Potong ho buat sira seluk, hakarak han Ikan no ai-han lokál. Se ita-boot sira hakarak, iha inisiativa atu hahú ida-ne’e. Ita orienta ekipa jestaun sira iha suku no postu, ita orienta katak imi ba soso ai-han sira ne’ebé prodús iha ne’ebá, entaun osan ne’e la sai ona, hela ho ita prodús nafatin, ita-nia oan sira bele han hahan kualidade no naturál,” Nia hateten iha Salaun Maria-Tapo, kinta ne’e.
Nia hateten, presiza halo investimentu iha setór produtivu tanba munisípiu Bobonaru iha númeru populasaun boot no nesesidade konsumu mós aumenta kada tinan.
Segundu Adjuntu PAM Bobonaru ne’e dehan, to’o agora seidauk iha investór ida mak halo imvestimentu iha setór agrikultura, tanba ne’e oportunidade di’ak ba emprezáriu lokál sira atu investe hodi hasa’e ekonomia rai-laran.
“Se kuandu ita-boot sira lakohi tama, ema seluk mai tama labele dehan fali ami autoridade munisípiu mak la fó ida. Tinan barak ita hein, ita-boot sira la tama, ema mai tama ita lakon ona. Tanba ne’e, sei iha oportunidade ba ita-boot sira,” nia dehan.
Nia afirma, Bobonaru iha poténsia ba área agrikultura, turizmu no pekuária, peska no seluk tan. Maibé to’o agora sei kontinua abandona tanba emprezáriu lokál sira maiória halai hotu
Semedo reforsa Instituisaun Finanseira Estádu niab mós disponivél hela atu apoia kreditu, maibé emprezáriu sira mak seidauk iha inisiativa atu koko halo investimentu iha setór produtivu.
“Area sira-ne’ebé hamoris ekonomía ita-nia rai ne’e ita sei abandona hela, seidauk book. Primeiru, ita iha rekursu bee ne’ebé boot, maivé ita la utiliza bee ne’e hodi produs buat ruma, kuda ai-han ruma, haki’ak ikan, kuda ai-fuan oioin. Ita iha rai-tetuk ne’ebé luan, buras, agora sira bele halo ne’e ferik ho katuas de’it, Joven sira lakohi fila ba natar, kompañia sira iha osan mós lakohi tama iha área ida-ne’e,” nia hateten.
Notísia Relevante: SEKooP kuda Bafo-Kayrala ektar rua iha Halekou Ritabou
Jornalista : Sergio da Cruz
Editór : Cancio Ximes
