Komisaun F rekomenda ba MS-INFPM tau prioridade ba rekursu umanu
OEKUSI, 16 Maiu 2025 (TATOLI) – Prezidente Komisaun F, iha Parlamentu Nasionál, ne’ebé trata asuntu kona-ba saúde, sosiál, iguáldade jéneru no veteranu, Deputada Maria Gorumali Barreto, rekomenda ba Ministeriu Saúde (MS) no Institutu Nasionál Produtu Médiku no Fármaséutiku (INFPM), atu tau prioridade ba rekursu umanu liuliu espesialista atu haree ba asuntu ai-moruk nian.
Deputada Maria Gorumali Barreto, hato’o rekomendasaun ne’e bainhira hala’o fiskalizasaun iha Ospitál Referál Oekusi, nota katak iha espesialista farmasia ida husi nasaun Cuba, hatudu exemplu di’ak, hodi muda ai-moruk ne’ebé kaduka, sai fali ai-moruk prinsipál atu kura ba pasiénte sira.
“Buat ida mak interesante, bainhira ami vizita ba iha farmásia iha ospitál, ami hetan doutora espesialista ida husi Kuba, ne’ebé ajuda tebes ba iha farmasista sira, kuandu halo jestaun ba iha ai-moruk no mós oinsa uza ai-moruk sira-ne’ebé kaduka ona ou besik kaduka, maibé ai-moruk ne’e la so’e maibé utiliza fali, oinsa bele hadi’a fali atu kontinua fó ai-moruk ba pasiénte sira, ne’e mak ami foin hetan iha Oekusi,” Deputada Maria Gorumali Barreto, ba jornalista sira iha Oekusi, ohin.
Tuir dadús ne’ebé hetan husi servisu saúde ospitál katak moras kulit sira iha Oekusi bele atende ninia pasiénte sira.
“Ida-ne’e mak buat foun ida-ne’ebé ami hetan, no ami mós rekomenda ba INFPM tanba haree ba asuntu ai-moruk, sei ita mós presiza ema espesialista haree ba ai-moruk, tanba ita-nia ai-moruk iha Timor-Leste problema bo’ot, entaun ami mós rekomenda ba Ministériu Saúde atu tau prioridade mós ba rekursu umanu, liuliu ba doutor espesialista, la’os atende pasiente maibé ba asuntu ai-moruk nian,” nia rekomenda.
Iha biban ne’e, Sekretáriu Rejionál ba Asuntu Saúde, Luís de Jesus Neno, informa katak prezensa espesialista farmasia iha Ospitál Referál Oeksusi importante atu tau matan ba ai-moruk sira inklui fó atende ba pasiénte moras.
“Espesialista ne’e kapa’as, tanba durante ne’e, ita iha espesialista farmasia ida husi Kuba, ita kontrata nia atu haree ai-moruk sira iha Oekusi, karik laiha espesialista ida ba ai-moruk, depois kuandu mosu ai-moruk ida ita uza lahatene, entaun afeta ba ema hotu nia saúde, tan ne’e mak ita presiza define ai-moruk sira-ne’e,” nia dehan.
Entretantu, totál rekursu umanu ba espesialista iha Ospitál Referál Oekusi hamutuk 12 maioria husi Kuba, no daudaun ne’e Oekusi na’in-rua sei estuda iha unidade Kuba, ida hasai kursu espesialista ba pediatria no ida kona-ba kurasaun (fuan) nian.
Jornalista: Abílio Elo Nini
Editór: Florencio Miranda Ximenes
