DILI, 20 Maiu 2025 (TATOLI)—Komandante Unidade Espesiál Polísia (UEP), Superintendente Damião Correia, informa UEP koloka ona membru Komandu Operasaun Espesiál (COE-sigla portugeza) na’in-sanulu (10) atu reforsa servisu Komandu PNTL Munisípiu Bobonaru buka tuir autór sira-ne’ebé envolve iha kazu hamate joven ida iha Kailaku.
Damião ko’alia asuntu ne’e relasiona ho konfrontu iha Postu Administrativu Kailaku, Munisipiu Bobonaru, tersa ne’e, ne’ebé hamate joven ida ho naran Ronaldinho Mota Ximenes (23). Kazu ne’e akontese iha kampu futeból Kailaku, purvolta tuku 13:00 Otl, iha ámbitu serimónia hasa’e bandeira nasionál hodi komemora Loron Restaurasaun Independénsia RDTL ba dala XXII, 20 Maiu 2025.
“Ita orienta ona membru na’in-sanulu husi COE provizoriamente apoia bá iha Kailaku,” Damiao hateten ba TATOLI via telefónema, tersa ne’e.
Nia dehan, ekipa ne’e lidera husi Inspetór Xefe Polísia, Pateo Solo, hodi asegura fatin akontesimentu inklui apoia Komandu PNTL Bobonaru atu halo investigasaun ba kazu ne’e.
“Informasaun ne’ebé iha katak iha inísiu ne’e tiru pistola maibé ikusmai akontese fali konfrontu entre grupu rua no dehan vítima ne’e hetan sona. Joven ne’e mate tanba bala ka oinsá ne’e seidauk klaru. Orsida dehan katak ema sona, orsida dehan hetan tiru. Tanba ne’e, ita lahatene loloos kronolojia ne’e, más ha’u atu dehan katak kazu ne’e agora daudaun ne’e iha hela investigasaun nia laran,” nia haktuir.
Damião informa katak situasaun iha Kailaku konduzivu no polísia oras ne’e buka tuir hela suspeitu sira-ne’ebé envolve iha kazu referidu.
Entretantu, hafoin akontesimentu, família no autoridade seguransa transporta kedas vítima mai Ospitál Maliana hodi hetan tratamentu, maibé la konsege salva nia vida tanba sofre kanek grave iha perte hirus-matan liman-loos nian.
Iha tuku 16:30 Otl, família deside tranzlada mate-isin bá Hospital Nacional Guido Valadares (HNGV) hodi submete ba prosesu autopsia.
Família matebian ho inisiál AMS deklara katak sira deside ba autopsia tanba suspeitadu ba bala-musan.
“Ohin sira tesik ba hatudu foto dehan, kilat ne’e baibain tama la boot hanesan ne’e, ne’e mak ha’u dehan, entaun ami povu ne’e kaer kilat ka oinsá? Di’akliu ita lori bá prosesu atubele hatene loos mate ne’e tanba saida,” AMS haktuir.
Enkuantu, prosesu tranzladasaun mate-isin ba HNGV Dili hetan seguransa husi membru PNTL Komandu Polísia Munisípiu Bobonaru.
Jornalista: Natalino Costa/Sergio da Cruz
Editór: Xisto Freitas da Piedade
