ME rekoñese nivel eskolaridade iha territóriu sei menus infraestrutura eskolár
DILI, 26 Maiu 2025 (TATOLI)-Inspetora Jerál Gabinete Inspesaun Jerál iha Ministériu Edukasaun (ME), Maria Manuela Gusmão, rekoñese eskola sira nivel eskolaridade iha territóriu sei menus infraestrutura eskolár.
“Ezemplu eskola sira iha Hera ne’ebá ne’e tempu Indonézia nian, ita halo planu hodi hadi’a”, dehan ba TATOLI iha INFORDEPE Balide, ohin.
Inspetora Jerál ne’e hatete eskola kuaze seidauk di’ak, talves inspetór eskolár sira la hatama programa. “Governu anteriór halo eskola foun barak-barak ne’ebé ho naran eskola komunitária, maibé barak mak la susesu, enves hadi’a eskola ne’ebé iha ona, lae”.
Diretór Ezekutivu Timor-Leste Coalitions Education (TLCE), José Monteiro, hatete ME presiza hadi’a kualidade infraestrutura iha territóriu.
“Infraestrutura la adekuadu, liuliu eskola filiál no paralelu sira ensinu báziku nian. Ezemplu eskola sira iha Dili, ne’ebé iha área estremamente remota no muita remota ne’e susar loos. Ida-ne’e Ministériu Edukasaun tenke tau atensaun”, nia dehan.
Tuir nia ensinu bázika sentrál ne’e kuaze nia kondisaun infraestrutura di’ak, inklui ensinu sekundáriu no tékniku bokasionál no mós pre-eskolár.
Diretór Nasionál Infraestrutura no Edukativu iha ME, Hélio Lopes, hatutan ME aloka millaun $1.2 hodi konstrui saladeaula 42 ba eskola 14 iha Baukau, Lautein, Likisá, Bobonaru, Ermera, Ataúru, Manatutu no Vikeke.
“Tinan ne’e tenke foka ba ensinu báziku, tanba maioria eskola nia kondisaun ladi’ak ona. Maibé prosesu konstrusaun saladeaula iha prosesu aprovizionamentu ona”, dehan nia.
Totál eskola iha territóriu nasionál konta hosi pré-eskolár to’o ensinu sekundáriu jerál tékniku vokasionál hamutuk 1.481, kompostu hosi tékniku vokasionál 42, ensinu sekundáriu jerál 55 no eskola ensinu báziku no pré-eskolár mak barak liu.
Notísia relevante: ME notifika ona eskola ne’ebé nia infraestrutura la adekuadu
Jornalista : Osória Marques
Editora : Rita Almeida
