Embaixadór Brunei Darrusalam despede PR Horta

DILI, 27 Maiu 2025 (TATOLI)—Embaixadór Brunei Darussalam iha Timor-Leste, Wan Hadfi Lutfan, tersa ne’e, iha Palásiu Prezidensiál Nicolau Lobato, Bairru Pite, despede Prezidente Repúblika, José Ramos Horta, hafoin embaixador refere termina ona nia misaun diplomata iha Timor-Leste.

Embaixadór Lutfan, ne’ebé hahú nia kna’ar iha Juñu 2022, konklui ona nia misaun diplomátika iha Timor-Leste no sei simu kargu foun iha Brunei.

Prezidente rekoñese servisu Embaixadór nian no trajetória pozitivu relasaun nian durante nia mandatu.

Durante enkontru ne’e, Embaixadór Lutfan refleta kona-ba progresu signifikativu iha relasaun bilaterál, partikularmente iha tinan tolu ikus ne’e.

“Vizita Estadu Sua Majestade Sultan Brunei Darussalam mai Timor-Leste iha tinan 2024 no vizita Estadu Prezidente José Ramos Horta nian ba Brunei iha fulan-Novembru tinan 2023 nu’udar momentu pivotál. Interkámbiu nível aas sira-ne’e, nota, hamosu konxiénsia no interese konsideravel entre setór públiku no privadu sira husi nasaun rua ne’e,” Embaixadór ne’e hateten ba jornalista sira hafoin remata enkontru despedida ho PR Horta.

Embaixadór ne’e hateten, kooperasaun ne’ebé la’o daudaun no dezenvolve hela, hodi temi vizita nível aas oioin no enkontru ministeriál sira-ne’ebé foka ba hasa’e kolaborasaun iha setór xave sira hanesan saúde, edukasaun, indústria petróleu no gás, no konetividade aérea.

Iha oportunidade ne’e, Prezidente Ramos Horta hato’o apresiasaun ba Embaixadór Lutfan nia esforsu dedikadu hodi hametin relasaun Timor-Leste-Brunei Darussalam no dezeja susesu ba nia esforsu sira iha futuru.

Jornalista : Hortencio Sanchez

Editór        : Cancio Ximenes