Ramos Horta-Loro Horta diskute potensiál ba investimentu entre Xina ho TL
DILI, 27 Maiu 2025 (TATOLI)—Prezidente Repúblika, José Ramos Horta, tersa ne’e, hasoru malu ho Embaixadór Timor-Leste nian ba Repúblika Populár Xina, Loro Horta, hodi ko’alia kona-ba potensiál interese investimentu husi Guanxi Technology, konglomeradu xinés ne’ebé signifikativu, iha Palásiu Prezidensiál Nicolau Lobato, Bairru Pite, Dili.
Prezidente Horta rekoñese empreza nia vizita esploratóriu ne’ebé hala’o daudaun no avaliasaun téknika ne’ebé sei mai nu’udár sinál pozitivu interese internasionál ba potensiál ekonómiku Timor-Leste nian, partikularmente iha setór sira hanesan agrikultura, peska, mina-rai no infraestrutura.
“Timor-Leste nakloke ba investimentu estranjeiru ne’ebé aliña ho objetivu dezenvolvimentu nasionál no kaer metin ba Lei Timor nian, liuliu kona-ba protesaun ambientál no padraun laborál,” Horta hateten durante enkontru.
Prezidente Ramos Horta subliña katak, kualkér investimentu potensiál sei sujeita ba prosesu lisitasaun ida-ne’ebé transparente tuir padraun internasionál, hodi garante kompetisaun ne’ebé justu no rezultadu sira-ne’ebé di’ak liu ba nasaun.
Nia dehan, kriasaun oportunidade empregu ne’ebé signifikativu ba sidadaun timoroan sira, partikularmente foinsa’e sira, sai nafatin hanesan konsiderasaun primordiál ba kualkér projetu ho eskala boot.
Governu Timor-Leste, iha Prezidente José Ramos Horta nia lideransa, sei avalia didi’ak proposta formál ruma ne’ebé mai husi diskusaun hirak ne’e.
Sei fó prioridade ba inisiativa sira-ne’ebé mak hametin setór xave sira hanesan agrikultura nia prioridade prinsipál no kontribui ba dezenvolvimentu infraestrutura sustentável.
Prezidénsia iha kompromisu atu haburas ambiente ne’ebé konduzivu ba investimentu responsável ne’ebé apoia Timor-Leste nia interese soberanu no prosperidade ba tempu naruk.
Jornalista : Hortencio Sanchez
Editór : Cancio Ximenes
