Horta sei ko’alia kona-ba seguransa rejionál-komérsiu iha diálogu Shangri-La Singapura
DILI, 30 Maiu 2025 (TATOLI)—Prezidente Repúblika, José Ramos Horta, hala’o vizita traballu ba Singapura no iha ne’ebá ne’e, Xefe Estadu ne’e sei ko’alia kona-ba seguransa rejionál no komérsiu iha Diálogu IISS Shangri-La, ne’ebé marka ona ba loron 30 fulan-Maiu to’o loron 01 fulan-Juñu tinan 2025.
Notísia Relevante: PN aprova pedidu PR Horta hala’o viajen ofisiál bá Singapura
Deklarasaun ne’e, Ramos Horta fó sai iha entrevista eskluzivu ida ho Rede Televizaun Globál Xina nian (CGTN) bainhira to’o iha Singapura ba Simeira Seguransa Ázia nian ba da-22.
Tuir nota ne’ebé Tatoli asesu husi mídia Palásiu Prezidensiál, sesta ne’e, katak Prezidente Repúblika aborda asuntu xave rejionál sira antes Diálogu IISS Shangri-La ne’ebé sei realiza iha Tailándia.
Iha entrevista ne’ebé luan, Prezidente Ramos Horta trasa parseria ne’ebé buras entre Xina no Timor-Leste, hodi subliña kompromisu fahe ba estabilidade rejionál no kooperasaun ekonómika.
Prezidente mós aborda preokupasaun sira kona-ba Prezidente Trump nia polítika tarifa sira, hodi diskute sira-nia impaktu potensiál ba fluxu komérsiu globál sira no oinsá nasaun ki’ik sira hanesan Timor-Leste navega entre poténsia ekonómika boot sira enkuantu mantein autonomia estratéjiku.
Prezidente artikula aprosimasaun ekilibradu Timor-Leste nian ba seguransa Ázia-Pasífiku, defende diálogu multilaterál no rezolusaun pasífika ba tensaun rejionál sira.
Prezidente subliña kompromisu Timor-Leste nian ba prinsípiu sira ASEAN nian enkuantu mantein relasaun bilaterál ne’ebé forte ho poténsia boot sira, hodi koloka Timor-Leste nu’udar ponte-konstrutór iha ambiente seguransa rejionál ne’ebé kompleksu ba beibeik.
Jornalista : Hortencio Sanchez
Editór : Cancio Ximenes
