ESGP Mau Kruma Ermera reprezenta TL partisipa konferénsia SEAMEO iha Tailándia
DILI, 03 Juñu 2025 (TATOLI)—Eskola Ensinu Sekundáriu Jerál Públiku (ESGP, sigla portugés) Hélio Sanches Pina Mau Kruma Ermera, reprezenta Timor-Leste hodi partisipa konferénsia Ministériu Edukasaun nivel ASEAN ka The Southeast Asian Ministers of Education Organization (SEAMEO) iha Bangkok, Tailándia.
Konferensia ho tema “Developing a School Culture of Sustainability: The Sufficiency Economy Mindset Iin Climate Action in Schools” ne’e, partisipa husi nasaun membru ASEAN ne’ebé hala’o durante loron lima (5), hahú husi 27 Maiu no ramata iha 31 Maiu 2025.
“Eskola Mau Kruma ba ne’e tanba konfiansa Governu liuhusi Ministériu Edukasaun liuhusi Diresaun Nasionál Ensinu Sekundária Jerál ne’ebé depozita konfiansa ba ESGP Hélio Sanches Pina Mau Kruma Ermera hodi reprezenta Ensinu Sekundáriu Jerál Públiku hotu iha Timor-Leste ba konferénsia Ministériu Edukasaun nivel ASEAN-SEAMEO ne’e,” Diretór Eskola Ensinu Sekundáriu Jerál Públiku (ESGP, sigla portugés) Hélio Sanches Pina Mau Kruma iha Ermera, Miguel Soares, hateten ba Agência Tatoli liuhusi WhatsApp, ohin.
Nia hatutan, konferénsia durante loron lima ne’e ko’alia kona-ba mudansa klimátika, eskola verde no oinsa atu tau matan ba ambiente no resiklajeb ba materiál sira-ne’ebé mak la utiliza sai sai util.
Aleinde ne’e, nai dehan, introdús mós kona-ba filozofia husi The Southeast Asian Ministers of Education Organization (SEAMEO) mak “moderation, prudence and reasonableness” ba iha kurríkulu, vizaun no misaun eskola nian.
“Ida-ne’e sai hanesan planu eskola nian ba loron aban nian,” nia dehan.
Reprezentante estudante ESGP Maukruma, Sonia Maria Fátima, hateten nia parte sente onradu tanba bele parrtisipa konferénsia SEAMEO ne’e iha Bangkok.
“Ha’u sente onradu bele hola parte nu’udár reperezentante Timor-Leste nian. Ha’u sei aproveita konferénsia ne’e ho di’ak, nune nu’udár bukae ba dezenvolvimentu setór edukasaun liuhusi eskola. Ha’u sei fahe esperiénsia no koñesementu hirak ne’e ba kolega sira seluk iha ha’u-nia eskola no ba eskola sira seluk iha Timor-Leste,” nia hateten.
Entretantu, delegasaun husi Eskola Ensinu Sekundáriu Jerál Públiku (ESGP, sigla portugés) Hélio Sanches Pina Mau Kruma Ermera ne’e hamutuk na’in-neen (6), ne’ebé kompostu husi Diretór Eskola Miguel Soares, profesór Eduardo Madeira de Jesus no estudante na’in-haat mak hanesan Sonia Maria Fatima no Maria Menezes, Lagio Pinto Maia no Raul Martins Babo.
Nasaun ne’eb’e partisipa mak…TL, Thailand, Singapore, Malaysia, Indonesia, kammbodia, Brunai Darussalam, Filipina, Myanmar, China, Laos, Vietname.
SEAMEO
The Southeast Asian Ministers of Education Organization (SEAMEO, Organizasaun Ministériu Edukasaun iha Asia Tenggara) nu’udár organizasaun entre Governu rejionál ne’ebé harii iha tinan 1965 entre Governu nasaun sira iha Sudeste Aziátiku atu promove servisu hamutuk iha edukasaun, siénsia no kultura iha rejiaun ne’e.
SEAMEO hanesan organizasaun dia ne’ebé nafatin dezenvolve kapasitasaun rekursu umanu no esplora poténsia povu ida-nian, tanba SEAMEO iha vizaun no misaun atu dezenvolve rekursu umanu iha Sudeste Aziátiku, espesialmente atu halo moris ida-ne’ebé sai di’ak-liu iha kualidade no igual iha edukasaun, edukasaun saúde preventiva, kultura no tradisaun, teknolojia informasaun no komunikasaun, lingua, kombate mukit no agrikultura inklui rekursu natureza.
Hirak ne’ebé halo desizaun aas liu iha organizasaun SEAMEO ne’e mak SEAMEO Council, ne’ebé nu’udár Ministru Edukasaun husi nasaun 11 iha Asia Tenggara mak Brunei Darussalam. Kamboja, Indonézia, Laos, Malázia, Filipna, Tailándia, Timor-Leste no Vietname inklui Sekretariadu SEAMEO iha Bangkok-Tailándia.
Konsellu SEAMEO ka SEAMEO Council
The Southeast Asian Ministers of Education Organization (SEAMEO) ne’e iha Konsellu SEAMEO no membru sira mak hanesan; Prezidente: Juan Edgardo ‘Sonny’ Angara (Sekretáriu Edukasaun Filipina); Vise-Prezidente: Romaizah Mohd Salleh (Ministru Edukasaun Brunei Darussalam).
Membru Konsellu SEAMEO mak hanesan; Hang Chuon Naron (Ministru Edukasaun, Juventude no Despostu, Kamboja); Nadiem Makarim (Ministru Edukasaun, Kultura, Riset no Teknolojia, Indonézia); Phout Simmalavong (Mintistru Edukasaun no Desportu, Laos); Fadhlina Sidek (Ministru Edukasaun, Malázia); Nyunt Phay (Ministru Edukasaun, Myanmar); Chan Chun Sing (Ministru Edukasaun, Sinagpura); Permpoon Chidchob (Ministru Edukasaun, Tailándia); Dulce de Jesus Soares (Ministra Edukasaun, Timor-Leste); Nguyen Kim Son (Ministru Edukasaun no Treinamentu, Vietname).
Nasaun membru The Southeast Asian Ministers of Education Organization (SEAMEO) mak hanesan; Brunei Darussalam, Filipina, Indonézia, Kamboja, Laos, Malázia, Myanmar, Singapura, Tailándia, Timor-Leste no Vietname.
Jornalista : Hortencio Sanchez
Editór : Cancio Ximenes
