DILI, 05 Juñu 2025 (TATOLI)—Iha selebrasaun loron Mundiál Ambiente nian, Sekretáriu-Jerál Organizasaun Nasaun Unida (ONU), António Guterres, husu importánsia atu konkorda kedas akordu mundiál ne’ebé ambisiozu, kredivel no justu hodi hakotu poluisaun plástiku ne’ebé kontinua fó ameasa ba rai.
Nia subliña katak, poluisaun plástiku sai hanesan ameasa boot ida ba ekosistema sira, saúde ema-nian no klima mundiál.
“Poluisaun plástiku hakonu hela ita-nia planeta, estraga ekosistema sira, bem-estar no klima. Lixu plástiku taka mota sira, polui oseanu sira no fó perigu ba animál fuik sira. Mikroplástiku sira to’o hetan ona husi simeira foho Everest nian to’o tasi kle’an, nune’e mós iha kakutak no susu-been inan ema nian,” haktuir iha portál ONU nian ne’ebé TATOLI asesu, ohin.
Selebrasaun loron Mundiál Ambiente nian iha tinan ne’e foka liu ba solusaun sira hodi ultrapasa poluisaun plástiku nian. Antómio Gueterres fó bem-vindu ba aumentu husi konxiénsia públika no polítika oioin hodi hamenus uzu husi plástiku sira-ne’ebé uza dala ida de’it.
Maibé, nia alerta katak esforsu ne’ebé iha seidauk to’o tanba ema tenke la’o dook liután
“Ita tenke la’o dook liután, lalais liután,” nia hatete.
Iha fulan rua oin mai, nasaun sira sei halibur fali hodi negósia akordu internasionál ida-ne’ebé legalmente vinkulativu hodi kombate poluisaun plástiku.
António Guterres subliña, tenke abranje siklu moris tomak plástiku nian, hahú husi produsaun to’o soe no implementa prinsípiu sira husi ekonomia sustentável sirkulár.
“Ita presiza akordu ida-ne’ebé responde ba nesesidade sosiedade nian, aliñadu ho objetivu ambientál globál no Objetivu Dezenvolvimentu Sustentável (ODS), no bele implementa ho lalais no abranjente,” nia dehan.
Nia mós husu ba negosiadór sira-ne’ebé sei hasoru malu iha Agostu 2025 atu serbisu hamutuk hodi unifika vizaun no entrega akordu ne’ebé mundu presiza.
“Hamutuk, mai ita hakotu flagelo poluisaun plástiku no harii futuru ida-ne’ebé di’ak-liu ba ita hotu,” nia dehan.
Loron Mundiál Ambiente nian selebra kada loron lima (5) fulan-Juñu hanesan apelu globál ida ba konxiénsia no asaun ambientál, no tinan ida-ne’e destaka krize plástiku urjente ne’ebé mak krítiku ba sobrevivénsia moris nian iha rai.
Jornalista : Hortencios Sanchez
Editór : Cancio Ximenes
