DILI, 06 Juñu 2025 (TATOLI)—Ministériu Edukasaun (ME) hamutuk ho SundaGas Banda Unipessoal, Lda, no TimorGap inaugura edifísiu pre-eskolár iha aldeia Moris Foun II, suku Manleuana, postu sdministrativu Dom Aleixo, munisípiu Dili.
Diretór Jerál Pre-Eskolár, Ensinu Báziku no Ensinu Rekorrente, Apolinário Serpa Rosa, hateten nia parte apresia no ho inaugurasaun ne’e bele fó benefísiu ba ki’ikoan sira-ne’ebé hela besik ba eskola referida.
“Ami apresia no agradese ba apoiu ne’ebé mai husi SundaGas, tanba hanesan milagre ida ba Ministériu. Ohin, ita hetan edifísiu foun ida, ita hein katak edifísiu ida-ne’ebé bele fó benfisiu ba ki’ikoan sira-ne’ebé hela iha Aldeia Moris Foun II, atu sira bele aproveita ho di’ak,” nia hateten iha edifísiu pre-eskolár Aldeia Moris foun II, Manleuana, sesta ne’e.
Diretór ne’e hatutan, Ministériu Edukasaun iha vontade atu kolabora ho Ajénsia ne’ebé de’it atu kontribui ba dezenvolvimentu edukasaun liuliu edukasaun pre-eskolár.
Tanba ne’e, nia mós enkoraja komunidade Lisbutak atu lori oan sira atu aprende di’ak liután iha ensinu pre-eskolár ne’e, no tau matan ba eskola referida atu di’ak nafatin.
“Ba komunidade ne’ebé hela besik eskola ne’e, ita-boot sira tenke tau-matan ba edifísiu foun ne’e atu uza ho di’ak, nune’e eskola ne’e bele di’ak nafatin hodi fó benefisiu ba ki’ikoan sira. Responsabilidade manutensaun ha’u entrega ba ita-boot sira. Buat ruma aat, ita-bo’ot sira mak sei kontribui tanba ita-nia kooperasaun mak importante,” nia fó hanoin.
CEO SundaGas, Andy Butler, hataten SundaGas nia preparasaun ba harii eskola hahú kedas husi tinan kotuk no ohin konsege inaugura.
“Ami deside hodi hala’o konstrusaun ba eskola ida-ne’e, tanba ho kondisaun ne’ebé la permite ba ita-nia oan sira-ne’ebé eskola iha-ne’e. Nune’e, ami deside hadi’a eskola pre-eskolár ne’e, ne’ebé hamutuk ho ami-nia parseiru TimorGap,” nia dehan.
Nia relata, konstrusaun ne’e doasaun husi SundaGas Banda Unipessoal. Lda, parseria ho Ministériu Edukasaun no konstrui husi kontratór Quenino Unipessoal. Lda, ne’ebé kontrola husi education the futuru limited no hetan apoiu husi Autoridade Nasionál Petroleo ho montante orsamentu ba konstrusaun eskola ne’e hamutuk rihun $63.
Diretór Pre-Eskolár Moris Foun II, Julio Xavier, hato’o agradesementu ba kompañia SundaGas ne’ebe apoiu hodi harii ona pre-eskolár referida.
“Kontente tebes, tanba tinan barak eskola nia kondisaun la di’ak, maibe ba tinan ne’e eskola bele iha ona edifisiu foun ida. Ba oin, ami bele utiliza ho di’ak,” nia hateten.
Eskola pre-eskolar Moris foun II hahú konstrusaun iha inisiu fulan-Fevereiru tinan 2025, lori fulan tolu ho balun hodi finaliza ne’ebé kompostu husi sala tolu inklui sanitasaun.
Totál estudante ne’ebé ativa hamutuk 185 ho nia profesór na’in-haat (4).
Jornalista : Osória Marques
Editór : Cancio Ximenes
