DILI, 11 Juñu 2025 (TATOLI)—Prezidente Repúblika, José Ramos Horta, kuarta ne’e, kondekora Medalla Orden Timor-Leste ba distintu reprezentante internasionál na’in-rua nu’udar rekoñesementu ba sira-nia servisu esepsionál ba povu Timor nian no sira-nia kontribuisaun ba dezenvolvimentu nasionál, iha Palásiu Prezidensiál Nicolau Lobato, Dili.
Resipiente ne’ebé simu onra prestijiozu ida-ne’e mak Marc A. Weinstock, Enkarregadu Negósiu sira Embaixada EUA nian iha Timor-Leste no Bernard Harborne, Reprezentante Rezidente Banku Mundiál nian iha Timor-Leste.
Enkarregadu Negósiu sira Estadu Unidu nian Marc A. Weinstock servisu nu’udár Enkarregadu Negósiu Embaixada Estadu Unidu nian iha Dili dezde fulan-Agostu 2023.
Durante nia mandatu fulan 18 nia laran ne’e, nia superviziona melloria signifikativu sira iha koordenasaun misaun sira Estadu Unidu nian iha Korpu Pás, USAID, Millennium Challenge Corporation no Naval EUA Seabees.
Embaixada Estadu Unidu habelar informasaun ba munisípiu 13 hotu iha Timor-Leste, hodi hametin ligasaun sira iha baze entre komunidade Amerikanu no timoroan sira.
Weinstock hasa’e kooperasaun seguransa EUA-Timor-Leste liuhusi programa asisténsia umanitária, inisiativa seguransa marítima, melloria krítiku ba Aeroportu Baukau ho koordenasaun ho F-FDTL, no habelar atividade formasaun bilaterál sira inklui Dalan ba Dame, CARAT, no liu envolvimentu dezeña ida iha Programa Parseria Estadu nian ho Guarda Nasionál Rhode Island.
Reprezentante Banku Mundiál, Bernard Harborne hala’o kna’ar nu’udár Reprezentante Banku Mundiál nian iha Timor-Leste dezde fulan-Agostu 2021, hodi apoia Governu nia esforsu rekuperasaun ekonómika pos-pandemia.
Ninia mandatu foka ba diversifikasaun ekonómika, kriasaun empregu iha setór sira hanesan ekonomia azul no responde ba nesesidade populasaun foinsa’e Timor-Leste nian, inklui esforsu hodi kombate stunting (raes badak).
Harborne nia realizasaun importante sira inklui kolaborasaun ho Ministériu Finansa kona-ba reforma fiskál no jestaun finansa publika sira, ajuda estabelese Forsa Tarefa Inter-Ministeriál kona-ba Asuntu Sosiál ne’ebé foka ba nutrisaun no seguransa ai-han, no hametin diskursu públiku kona-ba elaborasaun polítika bazeia ba evidénsia.
Ninia esperiénsia kle’an ho Banku Mundiál dezde 2004 inklui serbisu iha tranzisaun sira pós-konflitu nian iha nasaun oioin iha Áfrika no Ázia.
“Servisu sira-ne’ebé hala’o husi Weinstock no Harborne hala’o hanesan ezemplu espíritu kooperasaun internasionál ne’ebé fundamentál ba pás, estabilidade no dezenvolvimentu nasaun nian. Reprezentante Rezidente Banku Mundiál iha Timor-Leste, Bernard Harborne, hala’o atividade sira-ne’ebé importante tebes hodi fó benefísiu ba ita-nia povu iha setór dezenvolvimentu nasionál oioin durante nia karreira profisionál,” Horta tenik iha nia diskursu.
Servisu sira-ne’ebé hala’o husi Enkarregadu Negósiu Estadu Unidu Amérika nian, Marc A. Weinstock, fó ona benefísiu ba timoroan barak iha tinan hirak nia laran no merese hetan rekoñesementu no valorizasaun husi Estadu.
Marc A. Weinstock sei kompleta nia kna’ar iha Timor-Leste iha meadu iha fulan-Junu tinan 2025 no asume nia kargu tuir mai nu’udár Vise-Xefe Misaun ba Reinu Eswatini iha Áfrika Súl.
Bernard Harborne ramata nia mandatu iha Timor-Leste iha final fulan-Junu tinan 2025 no sei hala’o nia kna’ar nu’udár Reprezentante Banku Mundiál nian ba Illa Salomão no Vanuatu.
Jornalista : Hortencio Sanchez
Editór : Cancio Ximenes
