OEKUSI, 12 Juñu (TATOLI)–Komandu Polísia Nasionál Timor-Leste (PNTL) Rejiaun Administrativa Espesiál Oekusi Ambenu (RAEOA) submete ona rezultadu investigasaun kona-ba membru Falintil-Forsa Defeza Timor-Leste (F-FDTL) ne’ebé mate mistériu iha postu komponente Navál Oekusi.
Notísia relevante:Mate-isin Reinaldo Ximenes translada ona bá Dili ho ró Berlin Ramelau
Komandante PNTL RAEOA, Superintendente Polísia Angelo Quelo, hatete ho akontesimentu ne’e ninia parte halo kedas atendimentu imediata hodi rekolla informasaun, ezaminasaun no informa kedas ba ministériu públiku.
“Ha’u hakarak informa, husi komandu Komponente Navál hato’o karta ofisiál ida, rejeita atu halo prosesu autopsia, ne’ebé ami mós informa kedas ba Ministériu Públiku no konsidera katak, deklarasaun ne’e vale, no prosesu autopsia ita la halo, maibé ita halo prosesu normál de’it, ne’ebé nia prova ho dokumentu ita submete ona ba Ministériu Públiku”, dehan nia ba jornalista sira iha Portu Iwao Kitahara Mahata.
Notísia relevante:Komodoro Higinio Neves klarifika membru F-FDTL Reinaldo Ximenes mate tanba tiru-aan
Dirijente ne’e informa, ninia parte liuhusi sesaun investigasaun la deteta objetu ruma durante halo identifikasaun no ezaminasaun.
“Ita hetan de’it kanek no raan sai maka’as ho kilat ne’ebé hamutuk ho matebian iha fatin akontesimentu ne’e, ne’ebé prosesu tomak ami enkamiña ona ba Ministériu Públiku”, afirma.
Notísia relevante:Breaking News: Membru F-FDTL ida mate ho mistériu iha Oekusi
Reinaldo Ximenes mate ho diviza Grumete (GRT), moris fatin iha postu administrativu Laga munisípiu Baukau, ne’ebé envolve iha vida militar iha tinan 2021, mate husik hela nia fen kaben no oan ida, daudaun ne’e hela iha postu administrativu Laga, munisipíu Baukau
Jornalista : Abílio Elo Nini
Editora : Rita Almeida
