Muzeu Memoriál Bobonaru partilla informasaun prezerva memória pasada ba estudante sira
BOBONARU, 20 Juñu 2025 (TATOLI)—Muzeu Memoriál Munisipál Bobonaru, sesta ne’e, partilla informasaun kona-ba oinsá prezerva memória pasada ba estudante sira husi Eskola Katólika Padre Manuel Luis, Ensinu Báziku Raifun, Eskola Sekundaria Jerál númeru II Malibaka Yamato Maliana no Institutu Off Bussines (IOB) inklui reprezentante Juventude husi kada suku iha postu administrativu Maliana hamutuk ema na’in-50.
Notísia Relevante: 2024, Muzeu Memoriál Bobonaro rekolla narrativa funu 38
Koordenadora Muzeu Memoriál Munisipál Bobonaru, Marciana Gouveia Leite , hateten Muzeu Memoriál Munisipál Bobonaru hanesan instituisaun importante ne’ebé mak foti papél fundamentál tebes ba prezervasaun memória pasada ne’ebé inan-aman no juventude sira hasoru iha tempu pasadu.
“Atividade ne’e hala’o ho objetivu atu partila informasaun ba estudante sira kona-ba ezisténsia no papél Muzeu Memoriál Munisipál Bobonaru nian liuliu oinsá atu prezerva istória pasada durante períodu luta Timor-Leste hahú husi 1975 to’o 1999,” Koordenadora Muzeu Memoriál Munisipál Bobonaru ne’e hateten iha intervensaun ba serimónia partilla informasaun ba estudante no joven sira iha Muzeu Memoriál Munisipál Bobonaru.
Nia dehan, maske Muzeu Memoriál hola papél importante no fundamentál tebes hodi rekolla no prezerva istória pasada, maibé dalaruma komunidade no servidór sira iha instituisaun Estadu sira la tau importánsia.
Muzeu ne’e ezerse ninia funsaun importante iha sosiedade Timor-Leste nu’udár transmisaun koñesementu aprendizajen ba komunidade.
Aleinde ne’e, tuir nia,Muzeu memorial Bobonaru ne’e mós halo kolesaun, prezervasaun, estudu ezibisaun no disemina materiál Tranzivél no Intrazivél sira-ne’ebé nu’udár patrimóniu kulturál istóriku iha ámbitu edukasaun no peskiza.
Muzeu Memorial Munisipál Bobonaru ne’e estabelese iha fulan-Novembru 2023 bazeia ba dekretu-lei númeru 48/2017 no muzeu ne’e hamriik bazeia ba istória pasada no rekomendasaun husi vítima sira-ne’ebé iha 2002 Comissão de Acolhimento, Verdade e Reconciliação (CAVR) rekolla iha nunisípiu 13 iha territóriu.
“Muzeu Memoriál Munisipál Bobonaro establese hodi responde ba inisiativa husi sobrevivente sira, antigu kombatente no veteranu sira, vizitante, estudante, joven no komunidade,” nia dehan.
Profesór EBC Raifun, Firminio Leso, konsidera atividade ne’e importante tebes tanba oportunidade ba estudante sira bele haree no rona direta istória pasada iha Timor-Leste espesiálmente be estudante no joven sira iha munisípiu Bobonaru.
“Iha futuru ne’e estudante sira no juventude Bobonaru-oan sira atu komprende liután no mós hakle’an ba maluk no kolega sira-ne’ebé seidauk to’o iha fatin ida-ne’e, atu hatene istória ne’ebé prezerva iha muzeu ne’e,” nia dehan.
Muzeu Memoriál Munisipál Bobonaru establese husi Centru Nacional Chega, Institutu Públiku (CNC, I.P) ho objetivu atu prezerva dukumentu istóriku sira iha períodu 1974-1999 no fasilita informasaun ba públiku kona-ba istória pasada.
Notísia Relevante: Muzeu Bobonaro sei implementa atvidade tolu iha 2024
Jornalista : Sergio da Cruz
Editór : Cancio Ximenes
