Xefe Estadu konvida Liurai Mónaku vizita TL iha Novembru 2025
DILI, 25 Juñu 2025 (TATOLI)—Prezidente Repúblika, José Ramos Horta, konvida Majestade Liurai-mane Alberto II atu vizita Timor-Leste iha fulan-Novembru mai ne’e.
“Enkontru ho Liurai Mónaku Prezidente Repúblika atualiza kona-ba progresu ne’ebé agora Timor-Leste iha, Liurai Mónaku nia ema ida kampiaun no peritu ida kona-ba siénsia konservasaun marítima no nia apresia tebes ita. Prezidente konvida nia no nia mós atu vizita mai iha nasaun sira Sudeste Aziatiku hanesan Singapura, Labuan Bajo no liu ba Timor-Leste iha fulan-Novembru,” Sekretáriu Jerál g7+, Helder da Costa, hateten liuhusi Voice Recoard ne’ebé Agência TATOLI asesu husi mídia Palásiu Prezidensiál, ohin.
Bainhira Prezidente Repúblika konvida Liurai Alberto II, Liurai ne’e kontente tanba iha tinan 2008 ne’e nia vizita ona Timor-Leste.
“Ita-nia Prezidente konvida nia, nia kontente tanba dehan kle’ur ona nia la ba Timor, no nia hakarak tebes atu ba fali Timor-Leste,” Helder tenik.
Durante hasoru malu ho Liurai Mónaku, Prezidente Repúblika promove situasaun Timor-Leste nian ba Liurai ne’e.
“Iha enkontru ne’e ita-nia Prezidente atualiza katak Timor-Leste nasaun ida-ne’ebé iha dame, laiha violénsia no nasaun ida-ne’ebé fó atensaun ba konservasaun marítima no ita nasaun ida ne’ebé beleza naturál atrai ema turista no sientista sira vizita Timor-Leste. Prezidente mós atualiza ita-nia dezenvolvimentu infrastrutura ba Liurai kona-ba inisiativa lubuk ida mak Governu ne’e halo,” Helder hateten.
Iha oportunidade ne’e, Liurai Mónaku apresia no husu Timor-Leste atu mantein nafatin pás, trankuilidade atu haree povu nia prosperiedade tanba mundu nakonu ho krize. Timor-Leste tenke luta nafatin ba pás ne’ebé aposta iha multilateralizmu.
Jornalista : Hortencio Sanchez
Editór : Cancio Ximenes
