Jogadora timoroan na’in-tolu husi Austrália konfirmadu reforsa selesaun nasionál feto
DILI, 01 Jullu 2025 (TATOLI)–Diretór Servisu Selesaun Nasionál Federasaun Futeból Timor-Leste (FFTL), João Maneco Soares Amaral, hateten jogadora timoroan na’in-tolu (3) husi Austrália daudaun ne’e konfirmadu ona atu reforsa selesaun nasionál feto.
“Ita-nia jogadora na’in-tolu (3) ne’e raan Timor duni. Sira hela kle’ur iha Austrália maibé sira raan Timor tanba sira-nia inan-aman ema Timor. Ami trata ona sira-nia dokumentu hanesan sertidaun RDTL no Billete Identidade (BI), agora atu halo ona sira-nia pasaporte, Bainhira dokumentu loos ona mak iha fulan-Agostu ne’e, sira bele joga hamutuk ho ita-nia selesaun nasionál feto,” João Maneco Soares Amaral hateten ba Agência Tatoli, iha Faról, tersa ne’e.
Futebolista feto na’in-tolu (3) ne’e mak Emily Maria Rutkowski oan husi Aman Piotr Rutkowski no Inan Chin Rutkowski, Monique da Silva oan husi Aman Aquino da Silva no Inan Emma da Silva no Grace Sim oan husi Aman John Sim no Inan Lisa Pakeham.
Jogadora Monique da Silva daudaun ne’e joga hela iha klube Alton City S.C Primeiru Liga (State Leauge -1). Grace Sim joga iha klube Clifton Hill FC primeiru (State Leauge-1) no Emily Rutkowski joga iha klube football Victoria Team Primeiru Liga (State League-1).
Iha loron 30 fulan-juñu 2025, futebolista feto na’in-tolu (3) ne’e ho nia família aprezenta-aan ona ba FFTL ne’ebé simu direta husi Sekretáriu Jerál FFTL José Adilson, Diretór Interinu Tékniku FFTL Gaspar Quintão, Diretor Servisu Selesaun Nasional FFTL João Maneco Soares Amaral, Prezidente Assosiasaun Futeból Femenina Timor-Leste Engácia Pimentel Fernandes, Manager Team Lízia Magno, Treinadór Prinsipál Selesaun Nasional Feminino Eduardo Pereira, no Asistente Treinadór Octaviano Pinto.
Haree poténsia boot husi jogadora jerasaun timoroan iha Australia, Serafim Martins Santos ne’ebé nu’udar eskuteiru talentu ofisiál FFTL rekomenda jogadór na’in-tolu ba Diresaun Servisu Selesaun Nasional ho parte tékniku atu haree, no halo ánaliza ba jogadór hirak ne’e hodi haforsa selesaun nasionál feto, tan konsidera iha kualidade atu fó kontribuisaun signifikativu ba ekipa.
Daudaun ne’e, Diresaun Servisu Selesaun Nasionál hala’o hela servisu hodi ajuda trata jogadira na’in-tolu nia dokumentu identidade hanesan Sertidaun RDTL, BI no Pasaporte.
Família husi jogadór mós sente kontente tebes lori oan sira mai atu reforsa ekipa selesaun nasionál Timor-Leste nian, reforsa ne’e la’os atu manán de’it kada jogu maibé espera ba oin ekipa bele forsa liután.
Nune’e, jogadora na’n-tolu mós kontente no agradese tebes ba FFTL tanba bele konsidera ona sira-nia inisiativa ne’ebé mai hakarak reforsa ekipa selesaun nasionál feminina Timor-Leste.
Esforsu hirak ne’e, hanesan etapa ne’ebe atu lori entuziasmu no kualidade foun ba futeból feto Timor-Leste nian.
Jornalista : Hortencio Sanchez
Editór : Cancio Ximenes
