Membru F-FDTL komponente aero lijeira na’in-10 termina formasaun iha lian Inglés
DILI, 02 Jullu 2025 (TATOLI)–Membru FALINTIL-Forsa Defeza Timor-Leste (F-FDTL) husi komponete aero lijeira hamutuk na’in-10 termina ona formasaun iha lian Inglés.
Formasaun lian inglés ne’e atu aumenta liután koñesementu no abilidade membru F-FDTL komponente aero nian no formasaun ne’e apoiu husi Embaixada Estadu Unidu Amerika iha Timor-Leste.
Serimónia ne’e hala’o iha resintu Komponente Aero F-FDTL iha Aeroportu Internasionál Dili no hetan partisipasaun husi Komandante Komponente Aero Lijeria, Koronel Helder da Costa, no Segundu Komamandante Aero, Ten. Coronel Salustiano Vasconcelos, no Embaixada Estadu Unidu Amérika nia Enkarregadu Negósiu, Bruce Robert Begnell.
Formasaun ne’e atu hasa’e mós abilidade komunikasaun nian no haburas kooperasaun ne’ebé di’ak-liu.
“Parabéns! Ita-boot sira simu kna’ar ida ne’ebé susar no sai di’ak-liu. Dalen Inglés la’ós de’it lian globál ida, ida-ne’e hanesan ferramenta ida ba kooperasaun, fundasaun ida ba susesu operasionál no ponte ida-ne’ebé liga Timor-Leste ba parseiru rejionál no globál sira. Abilidade ida-ne’e, ita-boot sira hametin F-FDTL nia abilidade atu opera iha ambiente konjuntu no multinasionál, partikularmente bainhira Komponente Aérea kontinua buras iha misaun no relevánsia,” Enkarregadu Negósiu Estadus Unidus Amérika nian ne’e hateten liuhusi nota ne’ebé TATOLI asesu husi media Embaxadór EUA iha Timor-Leste, ohin.
Iha okaziaun ne’e, graduadu sira hato’o sira-nia agradesementu no fahe sira-nia esperiénsia iha kursu ne’e, hodi destaka nia impaktu ba sira-nia dezenvolvimentu profisionál.
Serimónia graduasaun ne’e marka signifikativu ida iha kooperasaun ne’ebé la’o daudaun entre Estadu Unidu Amérika no Timor-Leste.
TATOLI
