BOBONARU, 03 Jullu 2025 (TATOLI)—Sekretáriu Estadu Formasaun Profisionál no Empregu, Rogério de Araújo Mendonça, kinta ne’e, entrega sertifikadu lian inglés ba formandu kandidatu traballadór Programa Mobilidade Traballadór Pasífiku Austrália (PALM-sigla ingleza) na’in-211 iha Munisípiu Bobonaru ne’ebé konklui ona formasaun durante fulan tolu.
Sekretáriu Estadu Rogério informa katak kandidatu hirak-ne’e iha ona oportunidade atu update dadus pesoál ka Curiculum Vitae (CV) iha sistema Work Ready Pool ne’ebé estabelese iha Sekretaria Estadu Formasaun Profisionál no Empregu (SEFOPE) Munisípiu Bobonaru.
Governante ne’e hateten sertifikadu ne’e la’ós ikus husi aprende tanba ne’e husu ba formandu sira atu kontinua abitua-aan aprende lian inglés iha sentru formasaun privada akreditada sira hodi bele aumenta liután koñesimentu no abilidade nune’e bele atrai empregadór sira atu rekruta.
Notisia Relevante:Governu Austrália entrega internet Starlink ba SEFOPE, fasilita servisu sira ho lais
Iha biban ne’e, Rogério de Araújo Mendonça mós apela ba kandidatu traballadór PALM atu kuidadu kondisaun saúde, fiziku no labele envolve-aan iha krime.
“Imi hemu hela de’it tua kalan-kalan, fuma to’o kalan-boot mak foin toba no ikus moras, derepente ema bolu dehan bá teste médiku, sei hasoru problema. O-nia tempu sira-ne’ebé O lakon ba formasaun ne’e saugati de’it,” nia dehan iha edifísiu SEFOPE Bobonaru, kinta ne’e.
Entretantu, Sekretáriu Autoridade Munisípiu Bobonaru ba Asuntu Administrasaun no Finansa, Domingos da Costa, sente orgullu no agradese ba SEFOPE tanba kria ona politika ida-ne’ebé di’ak hodi fó oportunidade ba joven sira-ne’ebé la pasa iha rekrutamentu liubá.
“Iha momentu ne’ebá Bobonaru oan 4000 mak mai teste, maibé liu de’it 400. Ne’ebé, agradese ba SEFOPE tanba bele foti desizaun loke formasaun iha Bobonaru. Iha tempu ne’ebá, Bobonaru-oan sira la hetan oportunidade atu tuir teste hanesan ne’e. Sira bá tuir hotu iha Dili, maibé iha ne’ebá jerál. Agora daudaun ne’e Bobonaru-oan sira mak iha-ne’e,” nia haktuir.
Domingos apela ba formandu sira atu kontinua aumenta abilidade lian inglés tanba lian inglés hanesan janela ba mundu.
Aleinde ne’e, Diretór SEFOPE Delegasaun Territoriál Munisípiu Bobonaru, Leandro Vicente, reforsa katak programa formasaun ne’e fó benefísiu ba Munisípiu Bobonaru iha área importante tolu hanesan ekonomia, seguransa no edukasaun.
“Ha’u ko’alia uluk ba ekonomia. Se formasaun ne’e realiza iha munisípiu, normalmente joven hotu-hotu mai konsentra hotu iha-ne’e, entaun síklu osan ne’e la’o, ita-nia fa’an-na’in sira bele hetan lukru no mós rentál, tum-tum sira no karreta. Kona-ba seguransa, joven sira ta’uk halo asaun krime tanba kritéria PALM ne’e presiza komportamentu di’ak. Parte edukasaun, juventude liuliu iha área rurál hetan oportunidade atu hasa’e sira-nia koñesimentu no abilidade,” Leandro esplika.
Leandro afirma, SEFOPE Munisípiu Bobonaru iha tempu badak sei hatama hotu formandu na’in-211 nia dadus iha sistema.
Iha oportunidade ne’e, Kandidatu Traballadór PALM Munisípiu Bobonaru, Alito Batu Lete, konsidera liuhusi formasaun ne’e bele hadi’a sira-nia koñesimentu no abilidade lian inglés.
“Ami agradese ba SEFOPE tanba iha momentu ne’ebá ami teste iha Jináziu Maliana ami la pasa, maibé sira fó fali ami oportunidade mai tuir formasaun. Ohin loron ha’u ho kolega sira barak mak hetan valór eselente, very good no good,” nia dehan.
Antes ne’e, joven na’in-4.683 partisipa iha teste vaga online. Husi númeru ne’e, na’in-498 mak pasa no daudaun ne’e na’in-1-043 mak halo ona inskrisaun iha SEFOPE Munisípiu Bobonaru atu partisipa iha formasaun lian inglés. Enkuantu, na’in-3.242 tuir formasaun iha sentru formasaun privada akreditada iha fatin seluk.
SEFOPE ho embaixadora Nova Zelándia diskute MoU
Iha parte seluk, Sekretáriu Estadu Rogério de Araújo Mendonça, sei hasoru-malu ho Embaixadora Nova Zelándia ba Timor-Leste, Helen Tunnah, atu diskute kona-ba oinsá atu asina akordu (MoU-sigla ingleza) ba programa laborál Recognized Seasonal Employer (RSE), iha tempu besik.
“La sala iha segunda semana oin, ha’u sei hala’o enkontru ho Embaixadora Nova Zelándia hodi diskute kona-ba memorandu ida-ne’ebé ita atu asina hodi haruka traballadór sira bá servisu iha Nova Zelándia,” nia hato’o asuntu ne’e iha edifisíu SEFOPE Munisípiu Bobonaru durante halo intervensaun ba serimónia entrega sertifikadu lian ingles ba formandu sira.
Governante ne’e haktuir, iha fulan hirak liubá, nia parte ho ekipa bá survey fatin iha Nova Zelándia no empregadór sira hakarak tebes rekruta timoroan sira atu bá servisu iha área ortikultura, vitikultura no seluk tan.
Governante ne’e afirma kuota ba programa RSE ne’e boot, maibé importante mak traballadór sira kondisaun saúde tenke di’ak no iha abilidade lian inglés.
Tanba ne’e, Rogério dehan Governu sei fó mós oportunidade ba kandidatu traballadór Austrália sira atu kompete.
“Iha fulan Agustu sira-ne’e mak loke filafali vaga ba Nova Zelándia. Imi sira-ne’ebé mak ohin tuir ona formasaun ne’e, imi mós iha oportunidade bele kompete vaga ne’e,” nia katak.
Enkuantu, antes ne’e, SEFOPE deklara ona katak programa RSE ne’e faze dahuluk sei haruka uluk traballadór timoroan na’in-50 to’o 100 no sei kontinua hodi responde nesesidade merkadu traballu iha Nova Zelándia.
Jornalista: Sergio da Cruz
Editór: Xisto Freitas Piedade
