DILI, 04 Jullu 2025 (TATOLI) – Komité Nasionál ba Patrimóniu Kulturál Imateriál Timor-Leste (KOMNAS PKI-TL) apela ba Governu atu toma medida ba konservasaun ba ai-horis ne’ebé utiliza ba produsaun ba kabas hodi bele halo ba tais.
Tanba ne’e, Sekretaria Estadu Arte no Kultura (SEAK) hamutuk ho Ministériu Komérsiu no Indústria (MKI) bele hahú estabelese nota entendimentu ida ho Ministériu Agrikultura, Pekuária, Peska no Floresta (MAPPF), atu halo esforsu konjuntu ba konservasaun ba ai-horis ne’ebé fó kór naturál. Nune’e mós importante atu estabelese programa ba plantasaun algodaun hodi prodús kabas, atu kontinua fó apoiu rede soru-na’in sira iha futuru, no garante kontinuidade produsaun tais.
Tuir nia, importante tebes Governu hahú ona halo konservasaun ba ai-horis, liuliu algodaun, tanba Organizasaun Nasaun Unida ba Edukasaun Siénsia no Kultura (UNESCO, sigla portugés) rejistu ona tais hanesan patrimóniu kulturál imateriál Timor-Leste nian. Tanba ne’e, tempu ona atu hanoin mós kona-ba matéria-prima sira ne’ebé uza ba halo produsaun tais.
Hatán ba kestaun ida-ne’e, Ministru Komérsiu no Indústri, Filius Nino Pereira, hateten prosesu ida-ne’e mak serbisu interministeriál nian, no sei sai hanesan pakotekompletu hodi garante sertifikasaun ba tais, nune’e tais bele sai hanesan indústria ida ne’ebé bele fó moris ba ema barak.
Iha fatin hanesan, Sekretáriu Estadu Arte no Kultura, Jorge Cristovão, hateten importante tebes atu Ministériu Agrikultura bele envolve iha prosesu ne’e, hodi haree oinsá mak prepara ba konservasaun ba ai-horis ne’ebé uza ba produsaun ba kabas.
“Ida-ne’e atu ajuda ita-nia grupu rede soru-na’in sira bele garante matéria no fó sustentabilidade ba oin, hodi tais ne’e kontinua tama iha komunidade internasionál”, Jorge Cristovão hateten iha salaun Balide.
Notísia relevante:
Jornalista: Arminda Fonseca
Editora: Maria Auxiliadora
