Horta parabeniza Estadu no povu amerikanu
DILI, 04 Jullu 2025 (TATOLI)—Prezidente Repúblika, José Ramos Horta, parabeniza Estadu no povu amerikanu ne’ebé selebra aniversáriu ratifikasaun Deklarasaun Independénsia ba da-249 (04 Jullu 1776-04 Jullu 2025) iha tinan ida-ne’e.
Ramos Horta hato’o parabéns ne’e, bainhira partisipa iha selebrasaun tinan 249 Independénsia Estadu Unidu Amérika (EUA) nian, ne’ebé hala’o iha Embaixada Estadu Unidu Amérika nian iha Dili, foin lalais ne’e.
Alende fó parabéns ba povu amerikanu, Horta mós reafirma kona-ba amizade no kooperasaun ne’ebé kle’an no kle’ur entre Timor-Leste no Estadu Unidu s.
Durante diskursu, Xefe Estadu fó benvindu ba Enkarregadu Negósiu foun EUA nian, Bruce Begnell, no destaka papél esensiál Estadu Unidu nian nu’udár parseiru sólidu, hahú husi tempu luta ba independénsia to’o prosesu rekonstrusaun nasionál.
“Apoiu konsistente bipartidáriu husi Kongresu norte-amerikanu no husi administrasaun sira ne’ebé tuituir malu, hodi konsidera ida-ne’e fundamentál ba dezenvolvimentu institusionál no demokrátiku Timor-Leste nian,” Horta tenik iha nia diskursu.
Horta mós elojia impaktu konkretu husi programa sira kooperasaun EUA nian, ho mensiona espesiál Seabees Mariña EUA nian, ne’ebé harii ona eskola liu 100 iha nasaun no serbisu importante husi voluntáriu sira Korpu da Pás nian.
Prezidente Horta hanoin hikas ho laran-ksolok ninia kompromisu pesoál hodi halo advokasia ba kontinuidade programa sira-ne’e nian, ne’ebé reprezenta prezensa fízika ida-ne’ebé sólidu no kompromisu ida-ne’ebé dura hosi Estadu Unidu mai Timor-Leste.
PR Horta hato’o agradesimentu ba apoiu kontínua no dezeja susesu ba Enkarregadu Negósiu foun, hodi hatutan ho halo komik katak nia sei halo buat hotu atu nia mandatu iha Timor-Leste sai agradável liután.
Inísiu semana ida-ne’e, Embaixada EUA iha Timor-Leste ho orgullu selebra Loron Independénsia Amérika nian ba da-249. Tinan-tinan iha loron 04 fulan-Jullu, komemora ratifikasaun Deklarasaun Independénsia iha loron 04 fulan-Jullu 1776, hodi marka nasaun nia moris.
Tinan ida-ne’e, Embaixada EUA organiza resepsaun ida iha Rezidensia Xefe Misaun nian hodi fó onra ba okaziaun ne’e, ne’ebé taka ho tiru fogu-artifísiu.
Serimónia ne’e lidera husi Embaixada EUA iha Dili nia Enkarregadu Negósiu, Bruce Begnell no hetan partisipasaun husi Prezidente Repúblika José Ramos Horta, parte barak husi sosiedade no Governu Timor-Leste nian.
“Ohin kalan, ita mós selebra parseria ne’ebé forte no buras entre ita-nia nasaun rua, dezde Timor-Leste nia independénsia rasik. Estadu Unidu Amérika ho orgullu hamriik hamutuk ho ita-boot sira, no ami komprometidu atu kontinua parseria ne’e ba tinan barak tuir mai. Ita-nia relasaun bilaterál harii bazeia ba valór komun sira hanesan respeitu malu, amizade no kooperasaun,” Enkarregadu Negósiu Bruce Begnell hateten iha nia diskursu.
Embaixada EUA iha Dili hein ho laran ksolok ba selebrasaun Loron Independénsia iha tinan oin, bainhira Estadu Unidu Amérika sei marka aniversáriu ba da-250.
Jornalista : Hortencio Sanchez
Editór : Cancio Ximenes
