Komunidade husu MOP prioriza estrada Batugadé-Balibó iha OJE 2026
BOBONARU, 04 Jullu 2025 (TATOLI)—Komunidade husu Ministériu Obra Públika (MOP) atu prioriza iha Orsamentu Jerál Estadu (OJE) 2026 kona-ba kondisaun estrada husi diresaun Rotunda Batugadé liga bá Postu Administrativu Balibó Vila.
Abitante Batugadé, Manuel Afonso Letto hateten Batugadé sai hanesan odamatan-boot nasaun nian, ne’ebe liga husi munisípiu ba kapitál Dili no nasaun viziña Indonézia liuliu Atambua (Nusa Tenggara Timur).
“Ita-nia estrada aat hatudu imajen ladi’ak ba ita nia-maluk viziñu Indonézia. Ne’e dignidade nasaun nian. Tanba saida mak estrada ne’e seluk halo hotu ona, maibé rohan-oan ne’e husik aat to’o agora ne’e? Tanba ne’e, ami ezije ba Governu atu tau osan iha tinan ne’e para tinan oin bele konstrui ona,” nia informa ba TATOLI iha Nunura, Maliana, sesta ne’e.
Notisia Relevante: MOP submete pedidu asesu fundu impréstimu reabilita estrada Batugadé-Balibó
Aleinde ne’e, motorista Júlio Noronha informa estrada ne’e difikulta tebes komunidade atu halo movimentu, tanba kondisaun fízika atualmente maioria hetan estragada.
Nia haktuir katak tinan-tinan Governu no kompañia lokál balun sempre ateru rai hodi halo normalizasaun maibé iha tempu udan kontinua estragada.
“Di’akliu konstrui foun para ita labele gasta osan, tanba hela de’it rohan, to’o de’it Igreja Balibó nia kraik,” Júlio tenik. Enkuantu, estrada ne’e ho nia distánsia purvolta kilómentru 13.
Jornalista: Sergio da Cruz
Editór: Xisto Freitas Piedade
